uMthunywa
NXA sihamba lapha phandle sihlangana lemihlobo yabantu etshiyeneyo, abalezimilo ezitshiyeneyo, ezinhle lezimbi. Abanye uze ufise ukubona lalapho avela khona uyetshayela ihlombe labo abamkhulisayo bamfundisa umthetho.
Bakhona-ke abanye osuka uzibuze ukuthi umuntu uvela ngaphi kumbe wakhuliswa zinyamazana, ngoba okuphuma emilonyeni yabo kunuka phu ngeke uthi umuntu uvela ebantwini.
Okunye asazi kumbe ngumsebenzi umuntu awenzayo omenza angabi lesimilo, angakwazi ukuphilisana labantu, kodwa hatshi akulamsebenzi onjalo. Kukanengi abantu bekhuluma ngowindi, umuntu usuka amangale ukuthi vele nxa umuntu eqhatsha uwindi uhle adinge ongakwazi ukukhuluma labantu na? Kumbe umuntu ungena elungile atshintshe esephakathi?
Umuntu uthi ezihambela esiya ezitolo nango uwindi ethutsha ngomtshova esithi Hyper, Tredgold, eTown!!
wena uvele uthi hatshi angihambi, uzazizwa zibuya zilandelana inhlamba zakhona. Lingaphi icala ngokuthi umuntu akayi edolobheni? Sokumele ngiye edolobheni ngoba wena ufuna ngihambe kambe? Zamani ukuba ngabantu bakithi, wonke umuntu usesazi ukuthi owindi ngabantu abangakwazi ukukhuluma, kuyayangisa lokhu.
Abanye uthola umuntu ethethisa umuntu omdala ongaba nguyise kumbe unina kubangwa ukuthi kungani eyale ukugada owakhe umtshova, eminye imitshova ifile khonapho izihlalo zinsimbi zodwa, sokumele umuntu agade ngoba esesaba ukuthethiswa? Umuntu wonke ulelungelo lokuzikhethela imota afuna ukuyigada, angabanjwa ngamandla bakithi.
Erenkini khona angikhulumi, umuntu ufika lapho ayakhona sephethe impahla ngezandla izikhwama sezidabukile owindi sebezidabulelene bembanga, ikakhulu amabhasi la aya endaweni ezehlukeneyo.
Kunjenje kulikhefu lePhasika abantu bavakatshela endaweni ezehlukeneyo sebezadonselwana ngowindi sengathi umuntu kakwazi lapho aya khona. Litsho ukuthi umuntu angasuka endlini yakhe engazi lapho aya khona, liqiniso lelo?
Abanye umuntu nxa esakuncenga ukuthi ugade ubizwa khiwa, ubizwa mnandi uze ukholise lawe, gada ubone, uzabe suphathwa njengesikorobho, kwezinye izikhathi uze wehliselwe lalapho ongehleli khona umuntu engasela ndaba lawe yena segijimisa imali. Yekelani ukwenza njalo abadala, bakhulile phandle la, asibantwana, bangakwazi ukuthi wena awula siphatho. Izama ntsi ibhizimusi abantu bengasagadi, lawe umsebenzi ukuphelele ngoba bayakhuluma phela abantu.
Lingabantu liziphathe njengabantu, hloniphani abantu yikho labo bezalihlonipha. Kube sekusiba lamabhasi la aya emaphandleni, lapho-ke uzathola ujaha elentombi ezilindweni zonke ngoba phela labo oge sebesenzela ukugada mahala phela leyo bhasi umuntu ekhohlwa ukuthi laleyobhasi asoyakhe uwindi, laye uqhatshiwe. Lingadlali ngabantwana babantu bakithi libathembisa izulu emhlabeni, lingabaqili, fundani kwabanye benu ukuthi ukuziphatha kuyinto enhle.
Okusalayo yikuthi zinukeni amakhwapha bowindi, yazini ukuthi umuntu uphathwa njani, ngoba kusasa lawe uzahlangana laye lapha azibambe khona ubeyinhlanzi etshelwe ngamanzi.
