uMthunywa
SEKUKANENGI sinanzelela ukuthi abantu besilisa bakubona kuyinto emangalisayo kumbe enhle ukuhamba beqomisa yonke indawo phezu kwalokhu baqomisa amantombazana amancane.
Amadoda la ahamba ezitshaya izifuba ngokuthi wona azinkonjwa ama-player phela. Lokhu kuyinto ebuhlungu njalo edanisayo ikakhulu ngalezinsuku zegcikwane lengculazi eselithe lathanyela impilo zabantu abanengi kuleli. Asazi kumbe amadoda azinika izibindi ngoba ethembe ukuthi nxa ethe atholakala elaleli gcikwane azanatha amaphilisi athithibalisa leligcikwane.
Ngempela kuyinto embi ukudlala ngabantwana babanye abantu ngoba kusasa lawe kuzakuthola. Amadoda anje athanda ukudlala ngabesintwana nxa sekufika ithuba lokuthi abusiswe ngezingane avele aphiwe amantombazana.
Lokhu kuyethusa ngoba phela amadodakazi alindonda engenelisiyo ukuziphatha ezalwa nje ayabe esebelethe izinkinga angazidingelanga zona.
Lokhu sikutsho ngoba iBhayibhili liyakutsho ukuthi izono zabazali zizawela ebantwaneni babo.
Lokhu okuhlanyelayo uzakuvuna kuphela ingabe nguwe ovunayo kumbe abantwana bakho.
Laba abadume ngokuba ngama-blesser, o-sugar daddy kanye lama-player labo bayawazala amantombazana njalo kubabuhlungu ukuzwa kuthiwa umntanakho udlaliswe yindoda thize. Lokhu kuza ebantwaneni balo umuntu njengesijeziso kumbe sithi i-karma ngoba lawe wake wadlala ngezingane zabanye abantu.
Nxa ufikelwa yimizwa yokudlala ngomntwana womuntu uboke uthathe noma umzuzwana ucabange ukuthi ngelinye ilanga lokhu okwenza emntwaneni wabantu, labanye bazakwenza kowakho umntwana.
Lezi zinyembezi ezikhalwa yile “ntombi” yakho, lowakho umntwana bazamenza okufanayo abanye kube nguwe ozamduduza.
Uthola umuntu ephatha umntwana wabantu kubi emdlalisa, esenza konke akufunayo emacansini ekhohlwa ukuthi laye ulomntwana ongenziwa okufanayo. Owakhe umntwana kafuni ukuthi kube lomuntu omphambanisayo kumbe omzwisa ubuhlungu, umphatha njengeqanda, kafuni athintwe futhi angabulala umuntu ngaye.
Hayi bo! UNkulunkulu akasiso isilima.
Kuliqiniso elingeke liphikiswe ukuthi izinyembezi zithi zigeleza ziyabe zihambisana leziqalekiso. Bhasopa-ke ungafaki umntwana wakho enkingeni ngenxa yobumenemene bakho lokufuna ukubukwa okwesikhatshana.
Ngokutsho njalo sixwayisa labo abalokhu bebona kusesitayeleni ukwephula izinhliziyo zamantombazane ukuthi; nanzelelani ngoba kuyeza lakowakho umntwana!
