uMthunywa
SIHLE isandla esiphayo kulesamukelayo njalo siyanconywa. Yikho ngalokhu thina njengoMthunywa siyamncoma uHulumende ngesifiso sakhe sokukhuphula iholo lezisebenzi. Ungakhohlwa Mthwakazi ukuthi emavikini ambalwa adluleyo sake saloba sisithi abamankampani kabalandele uHulumende labo banike izisebenzi okuyimadlana ukuze benelise ukumelana lesimo somnotho.
Nanko lamhlanje uHulumende usehlela ukukhuphula iholo lezisebenzi zakhe njalo kukhangelelwe ukuthi isisebenzi esiphansi senelise ukuhamba ngekhaya lemali edlula i$600.
Yebo siyakwazi ukuthi lokhe liyingcosana njalo abanye lokhe bekhala ngokuthi likhwezwe futhi, kodwa loba kunjalo thina siyabonga lokhu okufiswa nguHulumende.
Izisebenzi zikaHulumende siyazikhuthaza ukuthi zilamukele leli holo lobanje lilincane, akusafanani laleli abakade belithola izolo. Njalo kuhle ukuthi sikhale sinanzelela umumo welizwe lethu ukuthi umi njani. Singasuki sifane lensane ezimane zikhalele iloba yini eziyifunayo zingelandaba lokuthi abazali bayenelisa kumbe hatshi.
Kuhle sibonge khona lokhu esikuphiweyo ukuze sithole okunye futhi kusasa kulokutshona sisola njalonje.
UHulumende uyakwazi akwenzayo yikho njalo kule iviki esuse ukusetshenziswa kwemali zakwamanye amazwe ebezisetshenziswa kuleli kusukela ngomnyaka ka2009.
Yebo kulokungunguna phakathi kukazulu ngesenzo lesi kodwa abaphathi bethu yibo abakwaziyo ngezezimali thina siba ngabokukhuluma kuphela.
Ukuze uHulumende lakusasa enelise ukukhuphula iholo lezisebenzi kuhle uzulu ananzelele ukuthi kumele siqale sibambane njalo silwisane lempande eyiyo ebambe intuthuko lenhlalakahle yezizukulwane zakuleli. Lokhu kuqala ngokulungisiswa komnotho welizwe lethu.
Kukanengi sikhuluma njalo loMongameli wethu, uMnangagwa ekhuluma ukuthi ukuze ilizwe lethu lilunge kumele kube buhlungu kodwa-ke kuzakwedlula lokhu kwelinye ilanga.
Izisebenzi zakuleli zizathola iholo elenelayo njalo lempahla yakuleli izathengiswa kwamanye amazwe okuzenza sithole imali yakwamanye amazwe.
Ngakho kulokuthi sitshone sikhalaza ngokuthi imali eholwayo incane kakhulu kule-poverty datum line, asibongeni khona lokhu esikuphiweyo sibuye sihlome ekuphakamiseni umnotho wethu.
