uMthunywa
AKULAMUNTU okhula elesifiso sokusebenza ezindlini zabantu, ukugebha ezivandeni zabo kumbe ukuba ngunogada.
Wonke umuntu ukhula elesifiso sokuphumelela lokukhangelwa ngabantu njengomuntu olesithunzi emphakathini kodwa esikhathini esinengi akwandanga ukuthi wonke umuntu athole lokhu akufisayo. Izimo esikhula ngaphansi kwazo kanye lezimo esikhangelana lazo nxa sesikhulile yizo ezisenza sicine sesingena kuloba yiwuphi umsebenzi ongasinika ukuziphilisa.
Banengi abahamba esikolo kwehlule. Behluleke khona ukuphuma ngitsho lokukodwa besekusiba yisiqalo sokungena imisebenzi umuntu angabe engayithandi.
Abanye njalo benziwa yikuthi imali zesikolo zaswelakala kungakho-ke abenelisanga ukuqeda izifundo zabo. Omunye uyaphumelela kuzifundo zakhe asuke lapho aqeqetshe emakolitshini kube kuhle kube njeya kodwa nxa sokusiza ekutholeni umsebenzi kubenzima.
Omunye njalo oyabe eqeqetshile angawuthola umsebenzi asebenze kodwa impilo ibenzima aqhubeke esebenza kodwa ephila impilo ebuhlungu uze uzibuze ukuthi esikolo wahambelani. Besokusiba lalabo abala ukuya esikolo ababengabatshona behlezi ezitolo kumbe belusile kodwa ngenxa yenhlanhla umuntu lo umthole esengusomabhizimusi owesabekayo olezimali ezimangalisayo.
Injalo impilo bakwethu, ekucineni nje sonke sidinga ukuziphilisa njalo amathuba ethu ehlukene. Omunye angavulelwa amathuba amanengi awadlalise omunye ahle awasebenzise impilo yakhe iguquke angabe esabuyela muva umthole esephila phakathi komhlane lembeleko.
Kungakho-ke umuntu lo lalo kumele asebenzise amathuba awatholayo ukuthi aphume empilweni yobumpofu.
Kungakho-ke ukusebenza kwakho emakhitshini ayisiso isiphetho sakho ngoba ungenelisa ukuthola izindlela zokuguqula impilo yakho.
Kuliqiniso ukuthi sonke silezidingo futhi silemideni okumele siyondle, kodwa futhi kubalulekile ukuthi uzame ukuthuthukisa impilo yakho ngokuzithuthukisa wena.
Njengoba umnyaka usaqala, kungani ungahlali phansi lomqhatshi wakho, lixoxe ngekusasa lakho uthole izeluleko ngezifundo ongajabulela ukuzenza. Manengi amakolitshi ongabhalisa kuwo wenze izifundo ezifana labo Admin Management, Computers, Marketing, njalo njalo. Ngale indlela ungabhalisela ukufunda usendlini.
Omama abasebenza ezindlini bandise ukuphangisa ukuqeda ukwenza imisebenzi yabo kungakho-ke kungabakuhle ukuba bacele abaqhatshi babo labo babavumele ukuthi benze izifundo besezindlini ikakhulu ngezikhathi zokuphumula sokudliwa ukudla kwemini, lesi yiso isikhathi ongasisebenzisela izifundo zakho.
Ukufunda khona vele akupheli njalo akulaminyaka, wonke umuntu angazifundela ngesikhathi sakhe.
Ohlakaniphileyo ulakho ukusebenza ngapha ezithuthukisa kwezemfundo ukuze kusasa laye avuke esengumuntu ofundileyo enelise njalo ukuthola umsebenzi ongcono nxa kuyisifiso sakhe.
Kuliqiniso ukuthi abanye abalaso isifiso sokufunda kodwa umuntu ofundileyo uba lamathuba athe xaxa kulalo ongelawo amaphepha. Kungumbono woMthunywa ukuba wonke umuntu azame ukufinyelela amabhuku ngoba ibhuku alilakuthi usukhulile kumbe hatshi, ulakho ukufunda ngesikhathi sakho kuthi nxa kungasavumi esikhwameni ume kancane ubusuqhubeka ngelinye ilanga.
