uMthunywa
SIHAMBA sinje siphila emhlabeni sihlangana labantu abatshiyeneyo, loba sabunjwa ngabumba linye kodwa sehlukene ngendlela ezitshiyeneyo. Indlela esiziphatha ngayo, esihamba ngayo, izenzo zethu azifani ngitsho lakancane. Kuqakathekile ke ukuthi singabantu umuntu ahlale eqaphele angahlaselwa zingozi ezikhona emhlabeni lo esiphila kuwo. Zikhona phela impisi phakathi kwethu ezizembese ngesikhumba sezimvu, ezimelele ukuhlasela lezo zimvu ezileleyo.
Umona ngumkhuhlane bakwethu, yisono, yinto engalunganga ngitsho lakancane, umona wenza abanye abantu bacine besenza okuhlasimulisa umzimba. Kanti vele wona umona usukela ngaphi? Kuyini okwenza umuntu acine seyinyamazana sefisela omunye umuntu okubi, aze amfisele lokufa ngitsho imbala? Umhawu yiwo-ke lawo olumathisa umlilo lo womona, umuntu akumelanga ahawukele lokho omunye umuntu alakho aze afise lokuthi ngabe kuyabhidlika konke lokho afe.
Leminwe kayilingani bakwethu, bakhona okumele baphumelele ukwedlula abanye, kodwa lokho akutsho ukuthi umuntu sokumele ahlale phezu kwezandla abanye besebenza beginqela imuli zabo ukuthi zihlale kuhle.
Kunengi okwenzakala lapha emhlabeni esikubona kusenziwa ngabantu abasuke baba lomona ngenxa yokuthi uzibani ukhomba ngophakathi abantwabakhe bamphethe kuhle, baphetsheya kwemingcele, omalayitsha bahlala bengena emzini wakhe. Yikho-ke lapho okusuka khona ubuthakathi umuntu angazibona sesiba lomhawu lomona ngento engasiyakhe, usecabanga ukudinga umuthi umuntu aphephuluze umuntu weNkosi oziphilela impilo yakhe emnandi. Kungani lawe muntu ungazami ukusebenza gadalala uphile lawe impilo le oyifisayo esibangela ukuthi umuntu aze afisele omunye umuntu okubi?
Asikwamukeleni Mthwakazi ukuthi loba sekutheni, loba ilanga lingaze liphume entshonalanga litshone empumalanga, kuzahlala kukhona ukuthi kulabanye abantu abazahlala belalokho wena ongelakho, njengoba iminwe ingalingani nje, lathi sinje singabantu bakhona abafitshane abanye ngabade, kunjalo phela empilweni, kodwa-ke asamukeleni lokho esilakho, sisuthiseke ngakho.
Okuqakathekileyo nxa singabantu yikuthi sitshiye phansi umona, lalezo zinto ezenza umuntu afise ukubulala omunye umuntu ngazo, akwaziwa ukuthi uzithethe ngaphi lowo muntu. Abantu bayaganga lapha phandle, ngenxa yothando lwemali lokuthi kuthiwe umuntu ucebile afise lokuhlonitshwa abe lesithunzi. Akulunganga ukuhawukela size sigange bantu, abanye umuntu uba lomona aze atshontshe, ukutshontshwa kwezinye izindawo bakithi, uyalimala! Asithibeni inhliziyo zethu singazivumeli zisenzisa okungalunganga, yebo umkhosi wenhliziyo kawuphalalelwa kodwa asiyilwiseni-ke inhliziyo le esilinga ukuthi senze iziga silimaza omakhelwane labanye bethu.
Asihlaleni ngokuthula Mthwakazi, sibambane, singabi lomona nxa sibona abanye bethu bephumelela, asibaxhase, baqhubekele phambili bephumelela, phela ukuphumelela kukamakhelwane kumbe kwesihlobo yikuphumelela kwakho njalo. Ngakho nxa sibambana sibe yimbumba sizanqoba konke okusihlaselayo njengesizwe. Phansi ngomona, kawulahlelwe khatshana le, ungumkhuhlane njalo uyingozi.
