uMthunywa
INYANGA ziyingxenye yempilo yabansundu njalo zilomsebenzi omkhulu wokusiza abantu ukuze isizwe sakheke.
Ekadeni beziyibo odokotela, ziyizo njalo ezipha amacebo, zilungisa konke okonakeleyo ngobuqotho langesineke.
Bezihlonitshwa njengendlela abafundisi abahlonitshwa ngayo namhlanje kodwa inhlonipho ebeziyiphiwa nguzulu isimane yatshabalala njengoba inengi lazo seziguquke zaba yizitha zesizwe, abathakathi bezigodo!
Inyanga ezinengi nxa zisenza ukuganga kwazo zigijimela ukuvika ngokuthi zisiza umphakathi.
Umbuzo okhona yikuthi ukubulala abantu kusiza njani umphakathi?
Nxa inyanga lezi ziqinisile ukuthi zisiza umphakathi kungani zingacabangi ubuhlungu obuzwiwa ngamalunga emuli zalabo ababakhweza mihla yonke?
Nxa besakha okweqiniso kungani bengakhuthazi labo ababacela ukuthi babakhwezele abantu ukuthi bazame ezinye indlela zokulungisa ezifana lokukhulumisana kulokubulalana?
Imitshado eminengi ichithekile ngenxa yalezinyanga zamanga ezinika abantu imithi yokudlisa omkabo kanye lezifaka abantu ulunyoka.
Inengi lenyanga zakhathesi zizigijimisela imali nanko phela ukwelapha kwazo kuhamba ku-adivethayizwa njengebhizimusi. Imali isihamba phambili kuthi ukusiza uzulu kuze ngemuva.
Ngenxa yokubhaha kwenyanga ezigangileyo lezi, lezamanga kusuka kudide umqondo ukuthi inyanga ziyingxenye yokwakhiwa kwemideni kanye lesizwe noma hatshi. Zona inyanga zoqobo zisesekhona kumbe sekungabathakathi bodwa?
Yona iZinatha, ekhangela ngokusebenza kwezinyanga ithini ngokuziphatha kwamalunga ayo la achaya ukuganga kwawo egcekeni? Nyathelo bani elithathayo ukuze ihlanze igama layo eselisemanyaleni ngenxa yalezizigilamkhuba?
Kungumbono woMthunywa ukuthi nga inhlanganiso le ibeka imithetho lezinqumo ezithile ngokusebenza lokuziphatha kwamalunga ayo.
Kuqakathekile njalo ukuthi ibuye ilandelele wonke amalunga ayo ukuze ibone ukuthi izinqumo lezo ziyalandelwa.
Bonke abazatholakala besenza okuphambene lezinqumo zenhlanganiso badatshulelwe izithupha ngoba yizigangi ezibulala isizwe.
