uMthunywa
KULE iviki silodaba olutshwaqisa umzimba olwemuli yeTsholotsho etshiye izakhamizi zesiqintini seMlotheni Line ebezisemngcwabeni zithithibele kulandela ukuthi ingcwabe isihlobo sayo igqoke ama boxer shorts andubana ifake lenja ephilayo egodini.
Isenzo lesi senzakale mhlaka 12 kuyonale inyanga.
Nxa indaba le iphuma, kubikwa imuli le ikholwa ukuthi lo akade bembeka wabulawa kungakho bebesithi kumele avuke ayezilwela.
Kuvele ukuthi umufi watshaywa yimota kweleSouth Africa walethwa eseyisidumbu sokuzokwenziwa imithanithani le.
Isenzo semuli le sethusa izakhamizi kungakho induna yesigabeni lesi uGampu isiyibize edale ukuze izothonisiswa ngesenzo sayo lesi esilizilo.
Asazi ukuthi isenzo semuli le singathi silisiko layo loba hatshi, kodwa amasiko afana laleli kawahlonipheki emphakathini ngoba phela esintwini isidumbu siyahlonitshwa, pho-ke nxa abantu sebezasisitheka lesidumbu benqunu kuyabe kusitshoni.
Amasiko yiwo phela aphethe impilo yomuntu ngoba adatshulwa ngokhokho bethu abayibo abosendo lomuntu, ungabona umuntu esewalahla kumbe eyangiswa ngamasiko uyabe elahleka sibili empilweni.
Loba kunjalo akhona amanye amasiko asuka angathi ayibuthakathi obenziwa emini libalele.
Kuqondile ukuthi amasiko ethu siwagogodlele njalo siwalandele kodwa akhona amanye ehlisa isithunzi semuli loba esomuntu.
Kuyadanisa ukuthi imuli le yacina ingasahloniphi ngitsho lomhlaba nanko phela yayiphethe imikhonto, inqunu ibeka isidumbu egodini yafaka lenja ephilayo yagqitshelwa phakathi.
Abemuli le kukhanya kabazisoli ngitsho ngesenzo sabo ngoba bebona kuqondile ukuze baphindisele lowo owababulalela omunye wabo.
Lanxa labo ababelapho babengeke baphumisele ukuthi kabavumelani lakho okwakusenziwa yimuli le kodwa babengeke babalele ngoba lo odluleyo engomunye wayo.
Okwakhathesi akukho okwaziyo ukuba kukhona okubi na okungabe sekusenzakala kulowo owabulala ilunga lemuli le.
Kungumbono waleliphephandaba ukuthi lanxa kubalulekile njalo kuyinto enhle ukuqhuba amasiko ethu kodwa akhona amanye okumele sitshiyane lawo ngoba eyibuthakathi obungaphumputhwayo ngitsho.
