uMthunywa
IMPILO esiphilwa linengi lezisebenzi kuleli izwisa usizi njalo iyadanisa. Imali esisetshenzelwa ngabantu kayisenelisi ukubaphilisa ngitsho khepha ayeneli ngitsho khona ukuthenga isepa kuphela kodwa lokhu.
Ubona abantu beswela ngitsho lamandla okusebenza bebunile, ikakhulu nxa inyanga isanda kuphela nanku phela bayabe bezibuza ukuthi bahluphekelani. Kuthi labo abayabe bekhangelane lodwendwe lwabantu uthole ukuthi sebesenza benyonyoba bengakhathali ngitsho ukuthi abantu abaphambi kwabo bajahile kukhona lapho abayabe begijimela khona.
Uthola umuntu ehlezi ehofisini enhle okwamagama othi nxa uyikhangele uze ufise lawe ukuthi ngabe phela kuyenzeka kube nguwe ohlezi khona. Into nje yikuba uyabe ungazi ukuthi imadlana ayitholayo ayeneli ngitsho khona ukuba athenge yona isepa yokugeza. Ngabe phela abanini mabhizimusi kunye loHulumende bayaphanga bakukhangelisise lokhu ngoba phela belahlekelwa yinkalakatha yemali ngokungasebenzi kwabantu abayabe bekhononela iholo labo.
Ngempela umumo welizwe okwakhathesi awumanga kuhle njalo ubani lobani kumele akuzwisise lokhu kodwa phela kuhle singakhohlwa ukuthi umuntu angeke asebenze elambile njalo ediniwe.
Phezu kwalokhu izisebenzi kumele zikunanzelele ukuthi ukungazimiseli emsebenzini akusizi ngalutho ngoba ngeke uvuke umkhonomi welizwe nxa kungasasetshenzwanga nzima. Kumele abantu bazimisele loba kunzima ngoba kwelinye ilanga kuzalunga.
Kulezinsuku manengi amankampani asexotsha abantu imisebenzi kungakho-ke wena nxa uthe wathola umsebenzi njalo ulokhe usemsebenzini kuhle usebenze ngamandla akho onke ngoba ungcono kakhulu kulalo ongelawo.
Kuziphathamandla zamankampani kungaba kuhle ukuba zikhangelisise impilo zezisebenzi ukuze lazo izisebenzi zibone ukuthi abaqhatshi bayazinaka.
Oyekela ukunakekela izisebenzi uzibulala yena yedwa ngoba zizasebenza zizihudula imali yehluleke ukungena enkampanini njengemfanelo.
Kuhle phela sikhumbule ukuthi abantu laba abasebenzayo kunengi abayabe bethanda ukuba benelise ukukwenza ngeholo labo njalo bayananzelela umumo welizwe njalo bazinikele ukubekezela.
Ngenxa yalokhu kumele sibaphathe kuhle sibone ukuthi loba ingenganani imali abayitholayo kodwa-ke bayancediswa ngokuthola lokhu okumqoka empilweni okunjengempuphu, isepa, amafutha kunye lokokuhambisa ukuze baqhubeke besiza emsebenzini.
