uMthunywa
USUKHONA njalo umbukiso wamabhizimusi oweZimbabwe International Trade Fair koBulawayo. Umbukiso lo owenziwa minyaka yonke edolobheni lakoBulawayo, uqale ngoLwesibili kuyonale iviki ngaphansi kwendikimba ethi “Harnessing linkages for industrial development”.
Lokhu kusitsho ukuthuthukisa amamakethe aselizweni leZimbabwe ukuze sithole inzuzo evela emazweni wonke jikelele.
Kwandile ukuthi osomabhizimusi abanengi njalo bevela kundawo ezinengi ezelizwe balubhekise koBulawayo bezobukisa impahla yabo. Inengi lezakhamizi zakoNtuthu lazo zandise ukugcwala njengetshebetshebe kaTshangane kulindawo, bezobona impahla ebukiswa kulindawo.
Iphephandaba likazulu selinanzelele ukuthi kuqakathekile ukuba izizalwane zakuleli zincedisane ekuvuseleleni amafekithali asemadolobheni ukuze kuvulwe imisebenzi kwabatsha.
Ukugcwala kwamabhizimusi asakhulayo kuyisitshengiselo sokuthi iZimbabwe ilakho ukuvuka ithi khwatshu kwezamabhizimusi nxa abantu bengahlanganisa amakhanda.
Isizwe sakhiwa ngokubambana lokuncedisana. Lalabo abesemaphandleni abakhuthazwe ukuthi baqine ngokulima, ngoba phela ukulima kulemali.
Lokhu mhlawumbe kunganceda lamakopa amanengi asemaphandleni ekuze athuthukiswe ngokuthola amathuba okuthi lawo abukise impahla zawo.
Lumbukiso esikhathini esinengi ujayele ukukhanga kuphela abantu bemadolobheni. Ngalokhu kungumbona waleliphephandaba ukuba umbikiso lo kumele uphakamise ngitsho lezizalwane ezihlala emaphandleni. Ngalokhu uhulumende kumele abone ukuba kumikhosi ezayo abantu bemaphandleni labo bayabuya kulindawo ngobunengi babo.
Bakhona phela abantu abaleziphiwo ekwenzeni imisebenzi yezandla efana lokubaza kunye lokuthunga, ngalokhu kungumlandu kahulumende lezinye inhlanganiso ezizimele zodwa ukuthi abone ukuthi impahla yalaba abantu layo iyafinyelela kulumbukiso.
Lokhu futhi kuzakwenza intuthuko ibekhona lasemaphandleni njengasemadolobheni.
Eminyakeni edluleyo abantu abavela emaphandleni abatholakala kulo umbukiso ngabantu abazobukisa ikakhulu inkomo zabo. Kuyadanisa kodwa ukuthi inengi labantu laba ababuya ukuzobukisa inkomo zabo ngabayabe behlala emadolobheni kuthi labo abayibo abahlala emaphandleni bekhangele izifuyo zabo kababi khona ngitsho kumkhosi lo.
Mhlawumbe lokhu kungabe kubangelwa yikuthi abanye babo bayabe bengakwazi ngemikhosi efana lale kumbe njalo bahlutshwa zimali zokuthwala inkomo ukuze zifike kulo umbukiso.
Kungakho kungumbono waleli iphephandaba ukuthi kubalulekile ukuthi uHulumende ancedise abantu abasemaphandleni ukuze benelise ukufinyelela kulo umkhosi ozabenza baziwe ukuthi benza izimanga kwezokulima emaphandleni.
Kuyadingakala njalo ukuthi inhlanganiso ezinengi ezisebenza emaphandleni lazo zikhuthaze abantu basemaphandleni ukuthi labo bahambise impahla yabo ngobunengi babo eTrade Fair.
Sikhangelele ukuthi kube lomehluko ngomnyaka ozayo kunani labantu abavela emaphandleni abazabukisa kumbukiso omkhulu kangaka ohlanganisa amazwe wonke ndawonye khonapha koBulawayo ukuze babelane ulwazi ngezamabhizimusi.
