uMthunywa
KULEZINSUKU kuvamile ukuthi sizwe ngabomama abatshiyeneyo abalahla abantwababo kumbe abababulalayo. Lokhu kusuka kudidanise amakhanda abantu ukuthi kambe nxa umuntu okhangelelwe ukuba abe lothando olukhulu esenza into elihlazo njalo eyisono esikhulu kangaka kuyabe sekutheni.
Akusahlali ngitsho lansuku ezingaki singezwanga ngabomama abaphuma emaphepheni kumbe kumabonakude kuthiwa balahle ingane.
Lokhu kuyinto embi kakhulu njalo esingakhangelelanga ukuthi yenziwe ngumuntu wesifazane. Umuntu wesifazane sikhangelele ukuthi abe ngumuntu othanda umntanakhe ngempela kodwa uthola abanye sebezibulalela abantwababo.
Umntwana uligugu kungakho-ke kumele athi angazalwa agcinwe kuhle, ondliwe aze akhule laye afike ebangeni lokuzinakekela. Kungakho-ke kubomama sithi nxa kuyikuthi usuzithwele njalo usizwa ungamfuni umntwana lo kumbe ukuthi kawusoze wenelise ukumnakekela kungangcono wenze amalungiselelo okuthi unike ababona ngokugcina abantwana abazintandane kumbe abalahlwayo.
Laba bazabona ukuthi umntanakho usezagcinwa kuwuphi umuzi kumbe anikwe enye imuli engabe idinga umntwana wokondla. Nxa bedinga imuli lapho umntanakho angondliwa kumbe akhuliswe khona bandise ukufuna ukudingisisa ukuthi abantu balimuli ngabantu abanjani njalo ngabantu abaphila njani ukuze bamkhethele indawo enhle elabazali abazenelisa ukumgcina kuhle.
Kungakho-ke lokhu kuyindlela engcono yokuhambisa izinto nxa ubona ungenelisi ukuzondlela umntwana.
Kubuhlungu njalo kuyethusa ukuzwa ngabomama abathi beqeda ukubeletha bathathe usane balukhame luze lufe kumbe balumbokothe ngengubo ngenhloso yokubulala. Kambe umuntu uyabe efikelwe yini?
Bakwethu omama kabafunde ukuthi ukuphiwa inzalo yisipho esikhulu njalo esiqakatheke kakhulu kungakho-ke ungaphiwa umntwana, mthande, mondle, umkhulise laye uzakugcina kwelakusasa.
Akusinto eyesabekayo na ukuthi umuntu angabamba umntanakhe amzeleyo ambulale ngezandla zakhe sibili khona kuthiwa umntanakho ligazi lakho.
Uzwa njani umuntu lapho esehamba ezitaladeni ebona abanye omama bebobotheka ngothando bephethe abantwababo kumbe bedlala labo? Uzwa kanjani umama owake walahla umntanakhe ngaphansi kwebholoho?
Kuqakathekile ukuthi omama bafunde ngendlela ezitshiyeneyo zokuvikela ukuzithwala nxa bebona angani abantwana bangumthwalo kibo. Kulabo abalahla abantwababo kumbe abababulalayo sithi watholani ngokukwenza lokhu ngaphandle kokuzisola? Uzwa njani kwelalamuhla?
Kuhle sibili ukuba ngomama abalothando labantwababo. Ozwa engenelisi ukondla umntanakhe akathathe amanyathela afaneleyo ukuze umntwana ondliwe ngabalaso isifiso sokukwenza lokhu.
