uMthunywa
UKUKHUMBULA amaqhawe yinto eqakatheke kakhulu emazweni ake abuswa ngabelungu. Amazwe amanengi alwa izimpi kwachitheka igazi labantu abanengi kulwiswa uchuku lwabamhlophe. Abantu ababesemazweni ayengaphansi kombuso wabacindezeli babehlupheka kakhulu, babethwele amagabha avuzayo. Ngakho-ke wonke umuntu owalwa kumbe owancedisa ukuthi uchuku lolu olungelandiswe luphele uyaqakathekiswa. Kuthi abafayo bezama ukukhulula amazwe abo bayakhunjulwa minyaka yonke.
Kusasa sikhumbula iqhawe lethu ubaba uDokotela Joshua Mqabuko Nkomo yena owayebizwa ngelithi Father Zimbabwe. Wayengabizwa ngalelibizo ngoba eyindoda eyayakhiwe yaba lomzimba omkhulu, kodwa wayebizwa njalo nje ngoba wayengubaba welizwe lonke. Wayesaziwa njalo ehlonitshwa. Wayengaziphakamisi njalo wayengaziqakezeli kodwa wayesekela izenzo zakhe kube yizo ezimphakamisayo, abantu kube yibo njalo abamqakezelayo.
Manengi ngempela amaqhawe akhulula ilizwe lethu leZimbabwe kodwa okaMqabuko simbiza kakhulu ngoba nguye owayekhokhela lawa maqhawe alele ngokuthula endaweni ezitshiyeneyo kanye lalabo abalokhu besaphila.
Kuqakathekile ukuthi wonke umntwana wenhlabathi azinike isikhathi sokuthakazelela lokubonga impilo lemisebenzi kaMdala Wethu.
OkaMqabuko wayeqakatheke kakhulu kumbali yethu ngoba wadela imuli yakhe wagijinyiswa ngabakhunkuli, wagcwala indawo yonke elunywa yimiyane ngenxa yokuba lothando lesizwe.
Kumele abantu bazibuze ukuthi ukuze umuntu asukume akhalale konke azinikele elizweni kutshengiselani ngobuntu bakhe.
UMqabuko wayehlala ekhalaza ngokuthi abansundu badudulwa emhlabathini wabo baphoselwa emaguswini, wayehlala ekhala ngokuthi abantu bangabandlululani ngemihlobo.
Kumele sithi simkhumbula kusasa sizibuze ukuthi ngabe silentokozo lenkululeko ngabe obaba oJoshua Mqabuko Nkomo laboMongameli uKhomuredi Robert Mugabe abazinikelanga ngendlela abazinikela ngayo. Ukuzinikela kwabo lokhu kulivelakanci.
Umdala wethu wayeyindoda emadodeni, umlweli wamalungelo ezisebenzi, ibutho, ingcitshi yezombangazwe.
Yiyo lindoda eyakhokhelela iqula elayamela abansundu emhlanganweni weLancaster House Conference oyiwo owaletha inkululeko lozibuse esimnambithayo lamhlanje.
Ngemva kokuthola uzibuse, uMdala wethu wayeyinsika yesivumelwano seUnity Accord sika1987. Ngaphansi kwalesisivumelwano kwahlangana amabandla amakhulu ezombangazwe kuleli. Lamhlanje isizwe sakithi silokuthula esigwaba ngakho.
Ukunikezwa kwamandla omnotho kwabensundu ngenye yezinto ezinengi ezalwelwa nguMafukufuku. Lamhlanje inzalo yeZimbabwe izitika okupheleleyo ngenotho yemvelo ekuleli.
Abatsha labo balenhlelo zabo ezaphawulwa ngubaba uNkomo ngokunanzelela ukuthi bayikusasa leZimbabwe.
Kumele njalo uHulumende akhangelisise isikhalazo sabantu ukuthi ilanga lokukhothama kweqhawe uMdala lenziwe ikhefu ngoba ngaleyondlela isizukulwane silakho ukwazi ukuthi ngubani njalo wenzani lowo okuthiwa nguMdala Wethu.
