uMthunywa
NANSI isikhathi sekhefu leKhisimusi sesisezinyaweni zethu. Lawo umnyaka omutsha ususondele. Lesi yisikhathi sokuthokoza impela, isikhathi sokujabula, sihlangene lezihlobo labangane. Amalungiselelo okuthakazelela amalanga la asesezingeni eliphezulu emizini eminengi. Phela loba izinto zingamanga kuhle awukho umuzi ofuna ukusalela ekuthakazeleleni iKhisimusi phela.
Kuzadidizelwa abantu bethenga lokhu lalokhuya, kudliwe izimali, kube kuhle kube njeya. Kuzagiywa kuze kudabuke izamende ingoma zokuphela komnyaka.
Kunengi okutshiwo yikuqala komnyaka omutsha kutsho ukukhangela emuva kumnyaka asebewutshiya, bekhangela phela ukuba kungaki okuhle lokubi abakwenzileyo. Phela inyanga ezilitshumi lambili asizo zokudlala ngazo, kunengi okwenzakalayo.
Abanye bathole imisebenzi, abanye bathatha, abanye baphumelela ezifundweni zesikolo, kuthi abanye labo bathenga izindlu lezimota. Kuyabongeka konke lokhu. Abanye labo ngabehlelwe zinhlungu ezitshiyeneyo. Kunengi lezizalwane zakuleli ezihlangane lakho ngoba umnyaka ka2019 ubungumnyaka onzima, imali bezingatholakali emabhanga, impahla etshiyeneyo ikhwela nsuku zonke ezitolo abantu bagijima besiya le lale bedinga okuya ethunjini abangakupha abantwababo.
Laba bakhangela umnyaka lo esesisiyawugqiba, zehle ezimathonsi ngoba ubathathele lokhu lalokhuya kugoqela izihlobo labangane. Abanye bayazisola baze bafise ukuthi ngabe bayaphiwa ithuba lokubuyela bagijime bayelungisa izikhexe abazitshiyileyo. Kuyabe kungasenani ngoba usudlulile lo umnyaka. Kuhle-ke ukuthi esikwenzileyo lonyaka kube yisifundo esizasisebenzisa.
Abadala bathi impilo ifana losane olufundela ukuhamba, luyawa lubuye luvuke njalo luzame lubuye luwe njalo. Abantu abalukhangeleyo bayabe beluhleka kodwa alwaze lwalahla ithemba lokuthi luzahamba. Kuyafana-ke lasempilweni, bakhona abawe kanengi besehluleka lapha lalaphaya, besilwa labantu babuye njalo bazisole nxa behlakaniphile, lababantu bazakwenza kuhle ngomnyaka omutsha ngoba besazi lapho abaphambanise khona.
Labo abenze kuhle silitshayela ihlombe bakithi akuqhubeke kunjalo kumnyaka omutsha. Kuqakathekile-ke ukuthi yiloba singabantu abakade bebophelene izinhliziyo labanye bethu sihlale phansi sicabangisise ngokuxolelana ngoba ngeke siye ndawo nxa singaxolelananga.
Asifundeni lapho sisiyangena kumnyaka omutsha ukuthi limpilo esiyiphilayo imfitshane, iyedlula nje njengamazolo kungakho-ke kumele sithandane, sixolisane isikhathi sisesekhona. Ocela uxolo ayisuye oyabe ephambanisile ngasikhathi sonke. Lophanjanisiweyo ulakho ukucela uxolo ukuze kubhulwe umlilo abantu benelise ukukhulumisana. Ocela uxolo usala inhliziyo imhlophe angathi ukhiphe umlandu enhliziyweni kukanti lo ocelwayo ulakho ukusala ezisola ecabanga ukuba kuyini okwenze umuntu lo weza kuye.
Abantu kumele bafunde ukuhlalisana lokuphilisana bethandana hatshi ukuzondana baze bangene omunye umnyaka bengakhulumisani. Silifisela ikhefu leKhisimusi elilenjabulo kanye lakho konke okuhle ngomnyaka omutsha bantu bakithi sengathi konke elikufisayo empilweni zenu lingakuthola.
