uMthunywa
NGENXA yokuguquka kwesikhathi inengi labatsha selibona ukungaziphathi sengathi yinto enhle kakhulu. Abantwana sebezinathela nje cala celeni baphaquze ngitsho lembanje kungabi ndaba zamuntu.
Ngenxa yalokhu abantu sebazibazela indlela zabo “ezilula” zokuthatha lokwenda. Kulezinsuku abantu sebetshaya umazivelela nje umuntu amane azendise labakibo bengazi kuthi mhla kungavuka kungamanga kuhle umuntu aqukule imitshaqana yakhe alubhekise ngakibo.
Abanye khona ukwenda kumbe ukuthatha bavele abafuni lakuzwa ngakho ngoba bakubona kuyinto engabenqabela ukuthi bakholise impilo zabo ngokupheleleyo.
Into esuka ilibalwe linengi labatsha yikuthi akulamuntu ohlala emutsha. Njengoba abadala besitsho nje ukuthi yonke endizayo iyahlala phansi mhla kufika kuwe ukuthi sekumele uhlale phansi pho uzathini njengoba isikhathi sonke ubudlala ungalungiseleli ikusasa, khona uzaqala ukudinga umuntu wokwakha laye usugugile? Yena ofuna umuntu oseke watshukwa ngabanye ngubani?
Ukwakha umuzi kuhle njalo ukuthembeka kuzifungo zenu kuqakathekile, hatshi lokhu osekusenziwa ngenye intsha kunyampisa inhliziyo.
Kuqakathekile ukuthi sinanzelele ukuthi okubangela ukuthi umuntu acine eseziphatha kubi yikuthi uyabe efuna ukusetshenzelwa engafuni ukuzisebenzela yedwa. Umuntu angafunda ulakho ukuziphilela impilo ayifisayo kungakho-ke kuqakathekile ukuthi abatsha baziphe ingqobe yokuqala bafunde bengakakhi imizi.
Phela lezinsuku inengi lamantombazana alisafiki lakuFomu 4, abantu sebejahe umendo. Akusi lamendo futhi ngamapoto ngoba zingabheda umuntu ubuya athuthe abuyele ngakibo.
Kuqakathekile ukuthi abantu baye esikolo. Into emangalisayo yikuthi wonke umuntu ufuna ukuthatha kumbe ukuthathwa ngumuntu ofundileyo. Labanye ababaleka esikolo bakhala ngezifundiswa. Kambe isifundiswa singafulathela umuntu wezinga laso sinamathelane lempumputhe?
Kanengi akwandisanga ukuba njalo nanko phela uBona uthethwe ngeyinye indlamabala. Asazi kumbe wena ongafuni isikolo uzayithola indlamabala ekuthandayo. Asazi njalo njengoba inhlanhla zabantu zitshiyana.
