uMthunywa
KULEZINSUKU umkhuhlane weCovid-19 uthwalise izizwe zonke zemhlabeni amagabha avuzayo. Sesedlula isikhathi sokwesaba umkhuhlane wemvukuzane lengculazi nje kuphela nanko phela iCovid-19 isithethe impilo zabantu abanengi ngesikhathi esifitshane.
Kunengi okubangela lumkhuhlane njalo ungahlasela yiloba ngubani, ayilazwelo.
Odokotela labezempilakahle bakhuthaza wonke umuntu ukuthi ahlale ezivikela ngokugeza izandla ngamanzi alesepa loba ngokusebenzisa imithi ebulala amagcikwane (sanitisers) ukuze ahlale evikelekile kumkhuhlane lo osuthe waqeda izizwe.
Kunengi okungenziwa ngumuntu ukuze azivikele kumkhuhlane lo okugoqela ukuhlala ngekhaya kuthi lapho ephuma phandle abone ukuba ufaka i-mask zikhathi zonke, ukungayi lapho okubuthene khona abantu, ukulandela izixwayiso zokuhlanzeka ikakhulu nxa ulophepha.
Umuntu wonke uyakhuthazwa ukuba alandele izixwayiso ezibekiweyo zokuvikela ukumemetheka kwegcikwane le-corona lona eselisanda elizweni lakithi.
Wonke umuntu usengozini yokuba le-corona kungakho kubalulekile njalo ukuba abazali bafundise ngitsho labantwababo ngomkhuhlane lo ukuze bakwazi ukuzivikela kuwo. Kulezinsuku yebo, abantwana bayawahlabela nje wonke amagama asedumile aze lomkhuhlane we-Covid 19 afana labo-social distancing, self isolation lamanye kodwa bangabe sesazi na ukuthi atshoni?
Kuyadanisa ukuba emalokitshini amanengi emadolobheni kukhanya sengathi abazali bawutshaya indiva umthetho wokuvinjwa kwabantu ezindlini nanko phela abantwababo babonakala bezidlalela nje cala celeni bebanengi. Kungakho kungaba kuhle ukuba abantwana labo bafundiswe ngalumkhuhlane ukuze lanxa bedlala bakwazi ukuzivikela kuwo.
Ukutholakala uleCovid-19 akulula ngoba kawukho umuthi oyelaphayo okutsho ukuba kungcono ukuzivikela.
Okunye okwenza umkhuhlane lo wesabise kakhulu khathesi yikuba sekusebusika njalo ngenxa yokuba umkhuhlane lo kawuhambelani lomqando kutsho ukuba usuzakwanda kungakho-ke kuhle ukuba silandele izixwayiso zababona ngezempilakahle. Akudingi njalo ukuthi umuntu aze abotshwe ngabomthetho ukuthi alandele izixwayiso lezi ngoba impilo ngeyakho.
Kumqoka futhi ukuthi lo osethe watholakala eleCovid-19 kungathiwa aye ku-self quarantine akulandele lokho ukuze angamemethekisi umkhuhlane lo.
Okokucina kuhle njalo ukuba munye ngamunye wethu sithembeke singaze samukela labo abavela kwamanye amazwe abangazange bahlolwe njalo bagcinwe kuma-quarantine centres okwensuku ezingu-21 ngoba lokhu kwenzelwa impilakahle yethu.
