uMthunywa
SONKE siyazi ukuthi abantwana bonke baligugu kungadingakali ukuthi lithumbu lakho kumbe hatshi kodwa kulezinsuku sifumana ukuhlukuluzwa kwabantwana sekuyinto evamileyo.
Into eyenziwa ngabantu ebantwaneni yephula inhliziyo kakhulu ngoba kulezinsuku sesithola abanye sebengababanjwa iganyavu, betshaywa babulawe abanye batshiywe besesimeni esibi abanye labo bacine sebegogekile.
Kula amaviki amabili amaphephandaba kunye lenkundla zokuxhumana bezigcwele udaba lomntwana weTsholotsho oleminyaka eyisificamunwe munye ozithweleyo.
Umntwana lo ngokutsho kwabodokotela kubikwa okwabangela ukuthi aqale ukungena esikhathini emncane kungabe kuyikuthi waqala ukuhlukuluzwa emncane.
Indaba yokuzithwala komntwana lo, isibhoboze amathumba amanengi okuhlukuluzwa kwabantwana esigabeni seTsholotsho okunakanelwa ukuba bebehlukuluzwa kodwa kungabikwa ngoba bekumbambathwa yizihlobo zalabo bantwana.
Ngokutsho kwenduna yakule indawo, uGampu uthe ukuphuma kwembiko yokuhlukuluzwa komntwana osesibhedlela se-United Bulawayo Hospitals kuveze ukuhlukuluzwa kwabantwana okukhona esigabeni sakhe osekubangele ukuthi njengenkokheli zomdabu zisukumele phezulu zibone ukuba ukuhlukuluzwa kwabantwana kuyaphumela egcekeni kuthi labo abagconwa ngakho bajeziswe ngumthetho ukuze abantu bakwazi ukuhlonipha amalungelo abantwana.
Kuyadanisa ukuthi abesilisa kungathi kabasakwazi ukwehlukanisa phakathi komntwana kunye lowesifazana osefanele ukuthathwa yikho nje sebehlukuluza abantwana abancane emacansini.
Chief Gampu
Kambe nxa umuntu ezahlukuluza umntwana acine esezithwele emncinyane amphuthise isigaba sobuntwana ekukhuleni kwakhe kubizwa kuthiweni.
Lokhu yikulimaza ikusasa labantwana abayibo abakhangelelwe ukuba babe ngabakhokheli bakusasa.
Akwaziwa ukuthi kungani abanye abantu belomona ongaka, kambe ngumoya onjani obangela ukuthi umuntu abambe usane iganyavu esazi mhlophe ukuthi ulimaza isipho esivela kuThixo.
Akusadluli iviki eyodwa singafumananga lendatshana emaphephandabeni kumbe kumisakazo ezikhuluma ngokuhlukuluzwa kwabantwana.
Enye into esuka idide ingqondo zabantu ngeyokuthi kambe umuntu ongubaba womntwana angamkhangela umntwana oyinkazana azizwe sibili embona samfazi abesemenza isihluku sokumbamba iganyavu kumbe nxa kuyikuthi usekhulile abe ehlala esiya laye emacansini.
Kulezinsuku sokusesabisa ukutshiya umntwana oyinkazana lomuntu wesilisa, kungabe kunguyise, isihlobo kumbe umngane ngoba akwaziwa ukuthi angasala emenzani.
Bakithi kambe umhlaba sowaguquka waba yini?
Abantu abasahloniphi lutho ngitsho lazo zona insane kunye lezalukazi.
Phela abantwana bayasethemba ukuthi sizabavikela ezingozini ezithize thina besesibabeka ezingozini zona eziyizo okumele sibavikele kizo. Kumele sinakekele abantwabethu sikhathi sonke kungadingakali ukuthi yithi esabazalayo kumbe hatshi. Kuhle abantwana bagcinwe kuhle batholelwe yiloba yini abayidingayo.
Kuhle bazali labadala ukuthi sinakekele abantwana sidinge indlela zokubaphathisa lapho abadinga khona uncedo njalo siphinde sibaphe uthando loluya oludingakalayo emuntwini wonke. Bakwethu akesifundeni ukuthi umntwana uligugu njalo udinga ukuthi thina njengabazali simthande njalo simnakekele hatshi ukuthi simhlukuluze.
