uMthunywa
KUVIKI elizayo imigwaqo yonke izabe ingalali nyoka kuvulwa amasango ombukiso omkhulu weZimbabwe International Trade Fair wona ozaqhutshwa edolobheni lakoBulawayo kusukela mhlaka 26 kusiya ku-30.
Yiyo le imikhosi elakho ukuvula izivumelwano ezisibekeliweyo njalo yiwo lumkhosi olakho ukuletha osomabhizimusi abatsha abangazovulela abantu amafemu kutholakale imisebenzi kuleli.
Minengi imizamo esisenziwa ukuba amankampani afana labo Merlin, iCold Storage, iDunlop kanye layo iNational Railways of Zimbabwe asukume ame ngezinyawo kuqale njalo ukuba koNtuthuziyathunqa njengakudala.
Okusadingeka yikuthi kulindelwe ubukhokheli bungene kuzivumelwano ezizathuthukisa impilo kazulu.
Kungumbono woMthunywa ukuthi ngemva kwalo umkhosi akusoze kusale kungelamehluko ikakhulu kuye uBulawayo yena ozabe ephethe umkhosi ongaka.
Kuyadingeka ukuthi izakhamuzi zakoBulawayo zamukele izethekeli ngezandla zombili ukuze izethekeli zizizwe zikhululekile njalo ziphile impilo emumethe amathamsanqa njalo ezakwenza bahambe bekhuluma kuhle ngesimo selizwe.
Lokhu kuzenza labalwisela ukuthi ilizwe ligcotshwe ngodaka langobubi bazizwe besiba lenhloni. Izethekeli lazo kuzamele zithole indawo ezibukekayo zokuhlala ukuze zingahambi zihlambaza ngelizwe lethu. Lokhu kuzenza labafisa ukuzevula amankampani babone ukuthi akulanto embi ngelizwe leZimbabwe ngoba lifana lawo wonke amazwe akuzwekazi leAfrica. Kungakho-ke kungumthwalo wethu sonke ukuthi siziphe umlandu wokuphakamisa idolobho lethu.
Kungumlandu wethu sonke njalo ukuthi labo ababuza indawo ezitshiyeneyo abazabe bekulo umkhosi sibaphathise ukuze siqhubekele phambili sisamukela izethekeli ngoba phela le ngenye yendlela yokuthuthukisa ilizwe lakithi ngokuhuga izivakatshi.
Mhla kuvulelwa uzulu njalo amasango eZITF sikhuthaza abantu ukuba basukume ngobunengi babo bayebona okubukiswa lonyaka mhlawumbe ezinye zalezozinto ezizabe zibukisiwe zingathuthukisa ilizwe lakithi.
Kungumbono woMthunywa njalo ukuthi iZesa ihloniphe izethekeli kanye lekhansili yethu ngoba asifuni ukuthi izethekeli zihambe zisithi zazinathiswa amanzi ezibholane. Asixhasaneni njengezizalwane zakuleli kumkhosi walonyaka.
