uMthunywa
UKUCHITHWA kwemiphefumulo abantu abasakwenzi into ezilayo, sebekwenza angani yikubulala inkukhu nje.
Iviki ephelileyo ibingalula kuye wonke umuntu kungakhathalekile ukuthi ulesihlobo sakhe esaphaphatheka saya eGoli loba cha, ngenxa yokufuna umsebenzi njengoba imisakazo, amaphephandaba kanye lenkundla ezehlukeneyo zokuxhumana beziqukethe indaba etshwaqisa umzimba yokubulawa kwenye indoda yakuleli, uElvis Nyathi otshiswe yizizalwane zakulelo ephila.
Ngesikhathi amazwe ezwekazi leAfrica elwisana lombuso wabamhlophe kungakhathalekile ukuba lo uvela kuliphi ilizwe kumbe uzelwe ngubani sekusuke kwathini abansundu sebevukela abansundu?
Ukubambana yikho okwenza kwanqotshwa isitha lamuhla igazi le-Africa yilo eselihlamukela eyinye inzalo yeAfrica. Ukungena kwelinye ilizwe kubangelwa yizizatho ezithile kungakho nxa umuntu engene kwelinye ilizwe ukumbulala kungabe kuyilo na icebo elingenza abanye bengabuyi kulelo lizwe.
Isenzo se-Operation Dudula sifana lesomuntu othi edlelwe amabele zinkomo zikamakhelwane abulale inkomo ezidle amabele akhe. Nxa umakhelwane engathi nanko amabele akho adliweyo ngicela inkomo zami ungazivusa na?
Okusuka kujinge uzulu yikuthi kanti yena uMongameli wakwele South Africa akulacebo yini angalithatha ngabantu bakhe njengoba kusobala ukuba kabazinuki amakhwapha ngezenzo zabo.
Minyaka yonke kuba lokungahlaliseki okubakhona kulelo lizwe kubulawe abokuza kodwa kasikaze sibone kuthathwa amanyathelo aqinileyo okuba lokhu kungaphindi kwenzakale futhi yikho nje kungathi kuyaqhubeka.
Ukuthula kumbe ukuphuza ukuthatha amanyathelo sokungenza kube lomvukela kulelo nxa amanye amazwe eAfrica engangenela esesola ukubulawa kwezizalwane zabo.
Yebo kambe kuba yizigwenxa zomlomo ezibangela ukuthi izizalwane zabo zicine zivukela abokuza kodwa kuhle ukuba abantu abangabakhokheli bakwazi amagama okutsho emphakathini ngoba kuyiwo acina esetshenziswa nxa sokubulawa abantu.
Ukuziphatha kwabantu bakweleSouth Africa kuzenza kucine kudwetshelwana imizila lemingcele ukuba owangale kabe ngowakhonale kodwa lokhu akungeke kusise ndawo njengezwekazi leAfrica ngoba sivele sidlelana ezintweni ezehlukeneyo njalo kulakho ukusikhipha isithunzi sethu.
Ukubakhona kwalezo zizalwane okuthiwa zingene ngokungekho emthethweni angithi kuthuthukisa umnotho walelolizwe. Angithi kuphucula lendawo yakulelo lizwe.
Kungumbono woMthunywa ukuba ukukhethana ngemihlobo lokhu akuphele ngoba kungayisikho okwakukhankaselwa zinkokheli ezalwisana locindezelo lwabamhlophe kwaze kwatholakala uzibuse emazweni ase- Africa ngokuncedisana empini.
Okwenzakala kweleSouth Africa sokudinga ukuba abakhokheli bamazwe aseAfrica bahlale phansi bahlanganise amakhanda ukuze kudingidwe indlela yokuqeda lobu ubudlwangudlwangu.
Akudingakale indlela zokuthi abokuza kulelo babiselwe kibo hatshi ukubaphatha ngalesi isihluku esisibona sisenzakala.
Abakhokheli bamazwe abakhulumisane hatshi ukuthi abantu bafake umthetho ezandleni zabo. Ekucineni ilizwe leSouth Africa lingawa kwezomnotho ngoba abokuza kulelo beyibo njalo abaphethe imisebenzi ethuthukisa inotho yabo.
