uMthunywa
KUDALA kwakusithi nxa ungena edolobheni lakoBulawayo utshaywe luqhatshi lwezibiliboco, ukhangwe layikuhlanzeka kwezitalada lobuhle bezakhiwo lokugcinwa kakuhle kwemvelo.
Idolobho belisaziwa ngokuthi ngelihlanzeke ukwedlula wonke. Belibizwa ngokuthi nguBulawayo Omuhle!
Khathesi sekunguBulawayo omubi, ogcwele phamu ngengcekeza.
Sikutsho lokhu ngenhliziyo ezibuhlungu ngoba sikubona ukuthi akunsuku zatshwala kungaqhamukanga umkhuhlane ebantwini.
Ingcekeza le ibuzana amavuko yonke indawo. Kunuka okubolileyo phose yonke indawo. Emkotweni kutshaya iphunga, phambili kwezitolo akuhambeki kuyanyakazela ngabantu asebechaya impahla abazithengisayo.
Sekukhula utshani phambili kwezitolo, okuyinto esasingakaze siyibone emzini kaLobengula.
Abanye bathengisa ukudla bekuchaye phezulu kwengcekeza kungela obona icala.
Abantu sebelomkhuba omubi wokulahlela izibi loba ngaphi. Uyamthola omunye esidla ibhanana, qede lapho ajikele ikhansi phansi. Lo ofuna ukuzikhulula uqonda emkotweni achithe okwakhe.
Lokhu kwenzakala mihla yonke ikakhulu kundawo eziphakathi kwemigwaqo ka -3rd Avenue usiyafika ku10th Avenue.
Kuyenyanyeka kuphinde kunyanyise ngengcekeza.
Labathengisi, abezitolo abenzi lutho. Ikhansili igoqe izandla layo icatsha ngomunwe isithi isikhuze yaze yadela.
Kambe yini edala ukuthi izakhamizi zakoBulawayo ziphenduke zibe ngamatshapha kanje?
Khona okwenza lekhansili ivume ukulawulwa ngamatshapha kuyini?
Sibuza ngoba sonke siyazi ukuthi ingcekeza iyingozi empilweni. Nanko sibhadala amaqubaquba emali ekhansilini njalo kumbhadalo le kulesilinganiso okumele sisetshenziswe ekuhlanzeni idolobho. Kodwa, ngesikubona kulezinsuku, kukhanya izakhamizi zibhadalela ize.
Pho nxa idolobho lingasahlanzwa, imali esiyibhadalayo isetshenziswani?
Yebo sizwile ikhansili ikhala ngokuthi ilobunzima ngoba kusilela izimota zokubutha izibi, kodwa sekuhlale isikhathi eside ilokhe ibetha isikhalazo sinye.
Akudingwe imali kuthengwe izimota lezo.
Nxa ungusomabhizimusi, ulesitolo enzikini yedolobho, uyenzani ukuthi uncedise ekuhlanzeni idolobho? Kudida ingqondo ukuthi uthole inqwaba yengcekeza eceleni kwekhefa. Phinde lapho ubone unkunzimalanga epaka umthwepha wemota engaboni ngitsho icala ngokugcola kwesitolo sakhe.
Abathengi bakhangwa yibucwazicwazi besitolo lokugcineka kwaso sihlanzekile phakathi laphandle. Kungakho labanikazi bezitolo lamankampani kumele adlale indima ekususeni ingcekeza edolobheni.
Akufakwe amabhimu phandle kwezitolo ezithengisa ukudla. Sikhankasela umthetho wokuthi isitolo ngesitolo kumele sibe lebhimu yaso. Okunye okwenza kulahlelwe izibi mahlayana yikuswelakala kwamabhimu.
Kodwa asithi ungayiswela ulahle nje.
Lani elithengisa iziwiji lomumbu, fundani ukuphatha amabhokisi lapho esizajikela khona amaphepha lezinye izibi ezivela nxa sesidle elikuthengisayo.
Enye ingqobe siyiphosela kuzakhamizi.
Inengi lethu ngelikholwa kusiKhristu kodwa ngendlela esingcolisa ngayo idolobho akuhambelani. Angithi liyatsho izwi eligcwele ukuthi ukuhlanzeka kukubeka eduzane loNkulunkulu.
Funda ukulahlela izibi ebhimu. Ungathengi ukudla endaweni engcolileyo ukuze lo othengisayo afunde ukuhlanzeka.
Kungumbono wephephandaba likazulu ukuthi kudingwe amaqhinga okuhlanza idolobho.
Ukuziqhenya ngokuthi siyizakhamizi zakoBulawayo omuhle kuqala ngokuqeda ubutshapha.
