uMthunywa
UKUTHUTHUKA kwezokukhulumisana lokuhanjiswa kwemibiko kuyinto enhle kakhulu njalo kungaletha inguquko ebalulekileyo emphakathini nxa kungasetshenziswa ngendlela eqondileyo.
Kuqakathekile njalo ukuthi abantu bananzelele izingozi eziza ngenxa yalokhu kuthuthuka kwezokukhulumisana lokuhanjiswa kwembiko nanko phela sekulokuganga lokuthatshwa kokubi ngenxa yobulembu.
Ngenxa yendlela zokukhulumisana ezifana labo-whatsapp, Twitter laboFacebook, sekulokuganga osekubhahile kakhulu emphakathini, abantu bayathethisana, beyisane kanye lokuthumezelana imibiko lemifanekiso ehloniphisayo.
Ngenxa yalokhu kuganga, isizwe asisakheki njengoba lemizi isichitheka mahlayana ngabo njalo ubulembu.
Ubulembu sebubangele kwabanye ukuthi abantu bangathembeki emitshadweni yabo.
Akula nto embi ngokusebenzisa ubulembu ngoba buyindlela elula njalo eyenelisekayo yokukhulumisana kodwa uhlupho yikuthi abantu basuka babusebenzise ngendlela ezingafanelanga.
Esikhathini esinengi kuqala sakudlala kodwa abantu bacine sebejola.
Uthole umuntu otshadileyo lanxa ehlezi lomkakhe abelokhu ethe nhlo kumakhalekhukhwini wakhe ezikholisela.
Abanye njalo ngabathumeza amabhayisikopo kanye lemifanekiso yabantu abanqunu.
Kambe nxa abantu abadala bezakwenza izinto ezifana lalokho, mfundiso bani abayinika abantwana?
Kwezinye izikhathi umphakathi wawusole abantwana nxa sebeziphatha butshapha ulibale ukuthi abantwana labo bayilokhu abayikho khona ngenxa yalokhu abakubona kubazali babo.
Ingozi enkulu kakhulu ngalokhu yikuthi abantwana bangabona imifanekiso le balakho ukuthi bayekwenza lokho abakubone emifanekisweni esemafonini abazali babo.
Lokhu kucina kubafaka engozini yemikhuhlane ethelelwana emacansini efana legcikwane lengculazi lengulamakhwa.
Abazali abathanda ukugcina amabhayisikopo abantu abasemacansini bayimfundiso embi kusizwe sakusasa, abasakhulayo.
Abantwana nxa bebona abazali babo begcina imifanekiso le kubomakhalekhukhwini babo basuka bacabange ukuthi lokho kuyinto eqondileyo.
Kungumbono kaMthunywa ukuthi uzulu wonke nga uyananzelela indlela asebenzisa ngayo ubulembu ukuze kwenqatshelwe ukumemetheka kwengozi eziza ngenxa yokusebenzisa ubulembu ngendlela engafanelanga.
Kuqakathekile njalo ukuthi abazali bonke bananzelele ukuthi nxa labo besebenzisa ubulembu, babusebenzise ngendlela ezakuba yisibonelo lakubantwababo, indlela eyakhayo.
Loba ubulembu sebuphucule ezemfundo kubalulekile kodwa ukuba abazali bahlole njalo baqaphele lokho okuvulwa ngabantwababo ngesikhathi besebulenjini ukuze benqabele ukuthi bafunde okubi.
Okunengi okwenziwa ngabantwana bakubona khona kanye ebulenjini kungakho-ke kuhle ukuba abazali babone ukuba bayalawula indlela abasebenzisa ngayo ubulembu ukuze bakhule belobuntu.
