uMthunywa
ASAZI ukuthi umuntu uyabe sedubeke okungakanani nxa seyatshontshela omunye umuntu lokho akusebenzele iminyaka eminengi yena avele atshontshe nje kungabi ndaba zalutho. Kumbe umuntu uyabe ephambene ekhanda? Liyakutsho phela leBhayibhili elingcwele ukuthi ukweba yisono esikhulu umuntu okungamelanga asenze, kodwa abanye bayatshontsha bezwisa abanye ubuhlungu.
Phela ukutshontsha kuqala ngento encane nje yikho-ke lapho okumele uzame ukukulwisa utshaye ngedolo phansi ucele kuMdali akuncedise ekulwiseni isilingo lesi ngoba ungakwekela ukweba lokhu kuzakonela impilo yakho kwenzeke amashwa angalunganga empilweni yakho uthi mhlawumbe kuyakuhlolela.
Kambe nxa umuntu ezaphuma endlini yakhe ekuseni avalelise imuli yakhe sibili athi uya emsebenzini esitsho ukuyatshayela abanye abantu izikhwama uyabe ephelele engqondweni? Kwehlulani ukuthi uthengise amatamatisi lemibhida njengabanye, loba kungeneli lokho okufunayo kuzalunga ngelinye ilanga, wonke umuntu uqala phansi. Wena ungumuntu onjani ofuna ukuvuka ulele uyetshontsha imisebenzi yabanye abantu beginqa beginqela wena ukuthi uzotshontsha.
Nansi-ke indaba, nxa lawe ungomunye walaba abalezandla, abaledimoni lokutshontsha, lizafika elingaliyo, lapho-ke ozabona ukuthi loba sekutheni ngeke lizikhothe emhlane iqili. Uzatshontshela abangatshontshelwayo, abangeke bakumele ukuthi bona bayasebenza ngamandla abo onke besebenzela imuli zabo wena ubuye ngokuhluthuna kuphela.
Imbuzi
Kuliviki iphephandaba lethu limumethe udaba lwamanye amasela amabili eSamlodi, eGwanda okubikwa anyenya ebusuku ayatshontsha imbuzi yesinye isakhamuzi esibayeni. Amasela la acina eselandelwa zinyosi sezigcwele ebusweni kunye lezandleni zingasuki kiwo loba kusebusuku besezihlala zibhuza inyosi lezo.
Inyosi lezo zize zathutha ngemva kokuba sebehambe kumnikazi wembuzi bayaxolisa. Banengi esihlangana labo sebeyizilima abanye sebehlanya sizwe ngabantu sebesithi wayelisela bamlungisa abaziyo. Uthole umuntu sehawulisa umzwele ukuthi shuwa umuntu wahawula kangaka ingaphi iNkosi, kukanti hatshi wayekhuzwa engalaleli waze wafika komlindi uyacina. Abanye umuntu uyafa ngoba seswele lapho angathola khona usizo ngoba engamazi lalowo muntu amntshontshelayo ukuthi angamthola ngaphi.
Omunye isikhwama satshona sinamathele esandleni ngendaba zokutshontsha lezi, sesingabasola abantu kodwa akusicala phela ukuvikela impahla zakho ngoba zinengi izigangi phandle lapha. Umuntu sengacabanga ukuthi into ayitshontshayo incane ngeke umuntu ayidinge, akulanto okuthiwa ayilancedo emuntwini, okwenza abe layo yikuthi uyayidinga.
Kungumbono waleliphephandaba ukuthi abantu kuqakathekile ukuba bafunde ukuzisebenzela bangafuni ukudla amandla abanye abantu.
