uMthunywa
SESIPHAKATHI kwelinye lamakhefu amakhulu kukholo lwesiKhristu. NgoLwesihlanu umhlaba wonke unanza iPhasika, ikhefu lapho amaKhristu akhumbula ngokufa lokuvuka kukaJesu.
Ngokubaluleka kwalelikhefu, sikhangelele ukuthi amakholwa aqonde emabandleni awo ayekwenza okufaneleyo. Labo abangasoze baye ezinkonzweni, kuhle ukuthi bachithe isikhathi ngokuthula, bananze ikhefu ngokuhlonipha.
Sikutsho lokhu ngoba kulabanye bethu abathaba baze badlulise, benze okungelani lekhefu lePhasika.
Uthola indlamanzi sezitshonela ukudakwa, kuthi abasakhulayo ubezwe besithi “bayazikhiphisa” emaphathini. Abanye ngabenza umsindo sebeqhunsa ingoma, sekusenziwa imcimbi.
Eqinisweni, ikhefu lePhasika kayisilo elenjabulo engelamkhawulo.
Asizifundiseni ukusekela ngenhliziyo amakhefu okholo afana laleli ukuze sibe yisizwe esiqonde nta ekholweni. Singenza kanje, okusihluphayo kungaphela. Konke esikufisayo empilweni zethu kungafezeka.
Okusuka kwesabise kakhulu kumakhefu anje yikulimala lokufa kwabantu kungozi ezibalisa ezemigwaqo lodlame. Kuyahanjwa ngePhasika, abantu bevakatshelana endaweni ezithile. Kulapho ke okuvela ingozi zomgwaqo. Abatshayeli bakhuzwa nsukuzonke ukuthi abaqaphele indlela abatshayela ngayo, bananzelele futhi abanye abatshayeli labantu abahamba ngenyawo.
Kulumnyaka sibone ividiyo yamabhasi egijimisana ngesiqubu esikhulu, okwadala ingozi eyatshabalalisa impilo zabantu. Kungumlandu wethu ukuthi sibakhuze abatshayeli abathanda ukunyathela amafutha ezimoteni. Uma kuvuma, kungangcono wehle kuleyo mota engakubulala. Kuyadanisa ukuthola ukuthi abantu bayamqakezela umtshayeli onjalo, uzwe kuthiwa uyintshantshu. Yekelani khona lokho.
Sicela amapholisa angene emgwaqweni enze umsebenzi. Awagcwale ama-road block ikakhulu emigwaqweni okwaziwayo ukuthi kuba lengozi ezinengi. Kodwa ke, kungumbono wephephandaba likazulu ukuthi kungabi lokuhlukumezana kuma-road block. Akufihlwa, kuyaziwa ukuthi kulamapholisa asuka esefuna ukubhadalwa ngemali. Endaweni yokuthi umtshayeli ohamba ngesiqubu abotshwe, uyakhipha “esincane” aqhubeke ngokwenza akufunayo.
Asiqapheleni kulokho.
Ukugijima kayisikho kufika. Singakuqeda lokhu nxa singazithoba, sibekwazi ukuthi ikhefu esikulo ngelani.
Ukuzinuka amakhwapha kungumuthi. Amakholwa awahambe enkonzweni ngobunengi, kube likhefu elinanzwa ngokuthula.
