uMthunywa
OKWENZA wonke umuntu avuke ekuseni aphosele le ingubo, ageze agqoke ayetshona emafekithali loba emankampanini atshiyeneyo yikuthi kumele umuntu asebenze ukuze imuli yakhe ithole okuya ethunjini.
Kuyadanisa ukuthi imali abantu abayivukela ekuseni bathi nxa sebengena ezitolo bethengela izimuli zabo bathole intengo yempahla eyehlukeneyo isikhwele yaze yaphinda loba kathathu.
Abezitolo kungathi vele abangasakufuniyo yikuthi abantu babambe imali ngoba kungavele kukhulunywe ngokuba uHulumende uzakhwezela izisebenzi zakhe iholo zihle zithi mhla ziqala ukuhola lentengo yempahla iqale ukutshintsha.
Ubona abantu beswela ngitsho lamandla okusebenza bebunile ikakhulu nxa inyanga isanda kuphela nanko phela bayabe bezibuza ukuthi kungani abezitolo kungathi kabafuni kubona belemali ezandleni zabo.
imali yaseMelika
Isimanga yikuthi amankampani amanengi ayanikwa imali yaseMelika ngentengo ephansi nguHulumende ukuze bathenge impahla ehlukeneyo yokusebenzisa ukwenza okuthile kodwa intengo abathengisa ngazo impahla zabo zidida umkhumbulo.
Osomabhizimusi bakulezinsuku bathatha lonke nje ithuba abalibonayo ukuthi babeke izaba ngokukhweza intengo yempahla.
Siyambonga uHulumende nanko phela uyazama ukuthi abantu bathole impahla ngemali efinyelelwa nguzulu wonke kodwa kusuka kube labanye abafuna ukudonsela ingqubekela phambili ekhona emuva.
Simtshayela ihlombe uHulumende ngokuthatha inyathelo lokuthi abantu abalemali bazithengele impahla etshiyeneyo kwamanye amazwe.
Mhlawumbe abantu bangazithengela bodwa impahla abayidingayo osomabhizimusi labo bazazinuka amakhwapha baqale ukwehlisa intengo zempahla ezitolo.
Ngempela isimo okwakhathesi asimanga kuhle njalo ubani lobani kumele akuzwisise lokhu kodwa phela kuhle singakhohlwa ukuthi bakhona abantu abafuna ukuphambanisa imizamo kaHulumende yokuthuthukisa umkhonomi wakuleli ukuze ubuyele esimeni sawo kusiyafika umnyaka ka2030.
Abanye abantu abaphazamisa imizamo kaHulumende ngosiphatheleni abatshona bemile ezitaladeni bephethe bekhweza nje intengo zemali. Ekuseni befika kuyabe kulenye intengo emini sokulenye lithi lisiyatshona elikaMlimu sebephinde bakhweza futhi. Aluba kuyenzeka ukuthi abantu bangazihluphi ngokuthenga imali yakwamanye amazwe bazisebenzisele yonale eyakithi mhlawumbe isimo singancwebeka.
Kuhle njalo ukuba abaqhatshi bakhumbule ukuthi abantu laba abasebenzayo kunengi abayabe bethanda ukuba benelise ukukwenza ngeholo labo kungakho kababone ukuthi babaholisa imali ezenza benelise ukugcina izimuli zabo.
Ngenxa yalokhu kumele ziphathwe kuhle kubonakale ukuba loba ingenganani imali abayitholayo kodwa-ke bayancediswa ngokuthola lokhu okumqoka empilweni ukuze baqhubeke besiza emsebenzini.
