uMthunywa
LIYATSHO phela leBhayibhili ukuthi yenza kwabanye lokho lawe ofuna kwenziwe kuwe. Babengaphosisi abatsho njalo ngoba kubuhlungu nxa sezibuya ngakuwe hatshi okokudlala, uyathi kuyakuhlolela. Yikho-ke lani bobaba elilemali lakho konke okubukekayo okuhuga abantwana abangamantombazana okumele likucabange lingakenzi ukuganga kwenu lokhu.
Cabanga kunguwe umntanakho sedlaliswe ngenye indoda eyintanga yakho yatshiya indodakazi yakho oyithandayo sime kubi njalo sitheleleke legcikwane lengculazi.
Okubuhlungu inengi lamantombazana lawa ngelisesikolo, ikusasa labo lihle libhidlike nje konakale yonke into. Likhumbule phela ukuthi intsha le yiyo ikusasa yelizwe, yekelani abantwana bafunde.
Lani mantombazana lingathatheki ngento ezingancediyo ezizawona ikusasa lenu, asephelile yini amajaha seligijimela oyihlomkhulu? Yebo kunzima ikakhulu lina elisemaNyuvesithi nxa libona abanye ontanga benu behamba ngezimota bengadli ezibabayo ngaphandle kwebilebile abazifakele lona.
Usuka uzibone sulahlekile susalele emuva abanye behamba lesikhathi lawe uthatheke weqele ikanti sungena engozini ezaphazamisa impilo yakho yonke.
Lingavumeli inhliziyo mankazana, uyaphila ngalokho olakho, yeneliseka ngalokho olakho, ngeke ufe ngoba lawo ma-blesser eliwagijimelayo ayingozi, azakudlalisa, akuthengele loba yini oyifunayo uzibone susemazulwini kodwa isiphetho ngumthwalo ongawufuniyo, kambe uyabe ezagcinwa ngubani umntwana wakhona njengoba lawe nje usagcinwe ngabazali?
Ngoba ixhegu lelo uzathi ulitshela ukuthi sume kubi lizahle lidliwe ngumswenya nje lenombolo zikamakhalekhukhwini zihle zale ukungena uthi ngumnyama kanti uzenzile.
Kungakho kuqakathekile ukuthi ungavumi ukuthatheka loba suhlangane lobunzima obunjani. Qinisela kuyadlula lokho, umuntu kafunde aqeqetshe ezifundweni zakhe asebenze, yikho ezathola lokho okufunwa yinhliziyo yakhe engasadingi lawo ma-blesser.
Yazi ukuthi ngemva kwawo wonke lawo maxhegu owabonayo agijimisa amantombazana amancane kulenina labantwana balo abakhalayo abadinga uyise osekhohlwe ngabo walandela okomhlaba.
Zibambe wena baba odlelezela abantwana babantu, njengoba lawe uzele nje koze kukufice lawe!
