uMthunywa
IZIHAMBI ezigada amabhasi kunye lemitshova ikakhulu besiya emaphandleni kade zakhala ngesiphatho sabatshayeli kanye labancedisi babo sokubabhadalisa inkalakatha zemali ngesikhathi sekhefu.
Sokuphenduke kwaba yingoma ukuthi abavela emadolobheni bangafika emaphandleni baqale ukubuzana ukuthi ugade ngemalini.
Abatshayeli kunye labancedisi babo basuka bakhohlwe ukuthi okuncweba indlebe ngowakho, bephulele izigodo endlebeni. Akula ongaziyo ukuthi kubenzima okwesikhathi eside kulo umnyaka kuye wonke umuntu kubangelwa yimpehlane engene kuleli, eyobhubhane lwe-Covid-19.
Banengi akade bengasebenzi, kodwa njengoba isikhathi sekhefu sesisondele izihlobo kanye lezimuli ezisemaphandleni kumele zikhunjulwe abantu babuyele emakhaya bayobonana lezihlobo kulinywe njalo.
Kuzakuba kubi-ke nxa abamabhasi labemitshova ehamba emaphandleni bengasebenzisa ithuba leli ngendlela embi babe sebebhadalisa abantu inkalakatha zezimali zakwamanye amazwe ezingaholwa njalo linengi labantu abasebenzayo ngoba befuna nje ukuthi benze imali enengi ngoba kibo isikhathi sekhefu yisikhathi sokwenza umathanda lokubhadalisa imali oyifunayo izihambi.
Izihambi kade zakhala ngomkhuba lo wabamabhasi. Kungaba kuhle ukuthi uHulumende angenele, afake amabhasi kaZupco emaphandleni atshiyeneyo ukuze abantu bekele ukuhlukuluzwa ngesikhathi lesi.
Okudanisayo kakhulu yikuba ikhefu lalonyaka lifitshane ngoba labantwana bezikolo bazaphanga baphenduke sebezovula izikolo ngenxa yokuthi lonyaka kabafundanga kuhle.
Sokulesikhathi izihambi zikhala ngenkalakatha zemali ezizibhadaliswa zona kunye lempahla abayabe bezithwele yilaba abantu abayabe bengakunaki futhi lokuthi abantu bayaginqa ukuze bathole leyomali.
Kwezinye imota umuntu ubhadaliswa aze abhadaliswe ngitsho lesikhwama athwele ngaso izigqoko zakhe.
Aluba uHulumende uyafaka amabhasi akoZupco emaphandleni atshiyeneyo ukuze lonyaka abantu bahambe bekhululekile bayobona izimuli emakhaya.
Kuyadanisa ukuthi abatshayeli kanye labancedisa abatshayeli basuka bakhohlwe ukuthi imali yabo abayihola nyanga zonke bayithola ebantwini ababahlukuluzayo. Kungakho kuhle ukuthi bakhulumisane kuhle bazwanane, ukuze babe lobudlelwano obuhle lezihambi abazithweleyo.
Ngaphandle kokubhadaliswa imali ezinengi, kungabakuhle futhi ukuthi abatshayeli batshayele ngonanzelelo emgwaqweni njengoba izulu lisina umgwaqo uyatshelela kungakho ukutshayela kuhle kuzakwenza abantu bafike bephephile lapho abaya khona.
Kulithemba lethu-ke ukuthi abatshayela imota ezithwala abantu kunye labancedisi babo bazaguqula ukwenza kwabo kukhefu lalonyaka.
