uMthunywa
KUYADANISA kunsuku zalamuhla ukubona ukuthi inengi labantu esizweni sikaMthwakazi aliselandaba ngitsho lakancane lamasiko abo. Abantu abanengi sebehahabela amasiko ezizweni ezinjengeMelika lezinye ezisekudeni.
Abantu lamuhla sebelandela amasiko abamhlophe, okusuka kusimangalise ngoba lokhu kubuye kudale inkinga ezingapheliyo lapha emphakathini.
Njengephephandaba likazulu lona eliyinsimbi idlezinye, sizimisele ukuthi sikhumbuzane ngokuqakatheka kwamasiko ethu ngoba isizwe yisizwe ngamasiko lemikhuba yaso. Yiwo njalo lawo masiko enza isizwe sehlukane lezinye.
Ngalokhu uMthunywa uhlose ukwakha isizwe sikaMzilikazi yikho sikhuthaza uzulu omuhle ukuthi abambisane lathi ekufezeni linhloso eqakatheke kangaka.
Phela nxa singasayenzanga kanje izizukulwane ezilandelayo ziyafica kungasela ngitsho lamkhuba owodwa olandelwayo esikweni lakithi. Ukungazi isiko lakho kufana lokufa. Njalo isizwe esingazigqaji ngamasiko kanye lembali yaso, silahlekelwa yisithunzi phakathi kwezinye izizwe.
Labantu bakhona bamane baphile okwenyamazana zasendle ngoba bengasenelisi ukwahlukanisa okubi lokuhle.
Obekuzila njalo kuyinhlamba izolo, lamuhla sokuligugu eselikhwabithwa langubani. Lafa elihle sikhangele zulukandaba.
Kuthiwani-ke nxa sokunje esizweni? Thina njengephephandaba lenu silikhuthaza ukuthi lincedisane lathi ekuvuseleleni amasiko ethu, asingeke simane sigoqe izandla sekele amasiko ethu eginywa yimikhuba yezizweni.
Leli lizilo elingeke lafa lenzakala uMthunywa ekhona! Sizitshaya isifuba ngomsebenzi esiwenzayo ngoba lakhathesi nje siyavuselela ulimi lwethu ngaloleli iphephandaba likazulu. Abadala labatsha bafunda okunengi kundaba eziyabe zimunyethwe maviki onke.
Lamuhla ngenxa yokulahla amasiko kunengi okubi osekusenzakala esizweni sakithi. Ontanga inhlonipho sebayilahla ngamafasitela kuthi ukuziphatha kuhle khona akusaziwa. Utshwala kudala obebunathwa ngabadala kuphela lamuhla ontanga babunatha baze balale khona ubezwe sebethethisa ngitsho labazali babo.
Imitshado idilika njalonje obekungabhahanga endulo. Okwamadoda ahlangana emacansini khona angikhulumi ngakho. Njalo lamuhla ezimfeni umufi kasahlonitshwa njengasendulo ngoba sesalahla imikhuba eyayilandelwa kudala.
Ngeke sakubalisa sikuqede, ukugqoka khona osekusele nje yikuthi sibone ikakhulu amantombazana ezihambela nje eze emigwaqweni.
Kungasenani Mthwakazi omuhle asiphumeni lamaqhinga kanye lamasu amatsha esingakha ngawo isizwe sethu, esizigqaja ngobuntu kanye lamasiko aso.
Khangela ubone amanye amazwe anjengeNigeria, South Africa, Swaziland kanye leBotswana ukuthi azigqaja kanjani ngamasiko abo. Thina lathi kambe kungasehlula na? Yingqobe-ke leyo kithi sonke zizalwane zakuleli.
