uMthunywa
KULEZINSUKU akuhlali ngitsho insuku ezingaki singezwanga ngomuntu otshaywe kumbe wabulawa ngamasela wathathelwa impahla yakhe yonke kunye lemali. Amasela akulezinsuku aaselezibindi sibili nanko phela awasalesabi igazi lomuntu njalo awasathikazi ukuchitha umphefumulo womunye.
Kuyinto eyesabisayo sibili njalo etshwaqisa umzimba ukuthi kulabantu abafuna ukuphila ngezithukuthuku zabanye okokuthi kabesabi ukubulala kumbe ukulimaza.
Phela kulezinsuku kuthiwa bahle bakweqele libalele nje bakutshengise ingqamu bathi letha konke okuthweleyo.
Abasakudingi ukuthi uthweleni bayakufuna nje kungabe kuzimpahla zakho zokugqoka, omakhalekhukhwini kumbe ukudla obe ukuthengele imuli yakho.
Indaba ephume kuphephandaba leChronicle kuyonale iviki eyokugqekeza kwezinye izigebenga esikolo seLuveve iyadanisa kakhulu. Okusuka kudanise kakhulu yikuthi izigebengu lezi sezitshontshe imali yesikolo zaphinda zadlwengula ababalisi ababili kanye lomunye owesifazane. Kukanti kudaba olumunyethwe kuphephandaba lakule iviki kulendoda eyatshaywa yizigebengu njalo kucatshangelwa ukuba wakhitshwa ilihlo kanye lamaphambili.
Indaba zokuhlaselwa kwabantu lezi ziyadanisa kakhulu njalo ziveza mhlophe ukuthi izigebengu zakulezinsuku kazisesabi ngitsho ukuzwisa abanye abantu ubuhlungu.
Kuqakathekile-ke ukuthi abantu bafunde ukuthi ukuze bavikeleke kungozi ezinje kumele bazame ukuthi bahambe kusakhanya kukanti nxa kungaba mnyama bephandle bazame ukuhambela duzane lomgwaqo njalo endaweni ezisegcekeni. Phela lingavele likhothame vele sebeqalisile ukusebenza ngamandla.
Kuhle ukuthi abantu bafunde ukuthi ukuhamba ebusuku yikubeka impilo yakho engozini, ungabalakho ukuhlangana labantu abalezinhliziyo zobuhwaba njalo ezokubulala. Nxa kuyikuthi umuntu uthe wahlangana labantu abakhanya befuna ukumenza isihluku kungangcono sibili enze lokhu abakucelayo mhlawumbe bangamtshiya ephila.
Ukulwisana lezigebengu akuncedi ngoba ungacina usuye kogoqwanyawo ngenxa yento obungathi ungasebenza ngemva kwesikhatshana esifitshane uthenge enye. Mahlabezulu kungcono ukulahlekelwa ngumakhalekhukhwini wakho kunye lemali kulokulahlekelwa yimpilo. Phela izigebengu zalamuhla azilazo inhliziyo.
Ukulwisana labo yikuzilungiselela ukuvalelisa umhlaba kunye lemuli yakho. Kungangcono ukhanye njengesithutha esingelamandla kodwa usazi ukuthi elakusasa uzalibona njalo uzababona abantwabakho. Ukuhlaba umkhosi lakho akusizi lutho ngitsho lakancane ngoba akulamuntu ozakuza ukuzokusiza ngoba wonke umuntu esesabela impilo yakhe.
Kuqakathekile ukwazi ukuthi izigebengu lezi kazilakho ukuzwela umuntu ngoba engowesifazane nje. Kungakho-ke nxa bethatha lokhu abakuthathayo wena kungangcono uzithulele zwi ngoba ungawuhlaba umkhosi uzakuzwa ngqe ngengqamu kuphela.
Kungakho-ke kuhle sibili ukuthi abantu bonke bathathe amanyathelo okuzivikela ekuhlaselweni yizigebengu ngokugcina impahla yabo ifihlekile. Nxa kuyimali kayibekwe endaweni ecatshileyo sibili njalo akumelanga abantu bahambe beyikhipha ndawana yonke. Siyake sibone ogogo bebophela imali zabo endaweni ezicatshileyo sibahleka kodwa ngibona lokhu kungcono sibili.
Okokucina sithanda ukubonga amapholisa akithi ngomsebenzi omuhle abawenzayo ngokubopha lezi izephulamthetho kanye lesifiso sabo sokuthi uzulu avikeleke nxa ehamba ebusuku.
