uMthunywa
UKUZA kwabomakhalekhukhwini kwenza impilo yabalula nanko phela wonke umuntu usesenelisa ukuxhumana lezihlobo kanye labangane ngokutshaya ucingo yiloba engaphi. Akusadingakali ukuthi umuntu ahambe umango omude ukuze ayetshaya ucingo kumbe ukuthi odinga ulutho oluthile asebenzise imali enengi ngoba phela omakhalekhukhwini balakho ukwenza ukuxhumana kubelula. Phose wonke umuntu uselaye umakhalekhukhwini ngitsho lamaxhegu lezalukazi emakhaya.
Akusela sidingo sokuthi abantu bahambe imango emide besiyabonana ngoba balakho nje ukufonelana kumbe ukubhala imilayezo. Ngempela impucuko esilethwe ngomakhalekhukhwini lamakhompuyutha akulezinsuku yamukelekile emphakathini kodwa yinye nje into eyinkinga. Abantu abaselakho ukuxoxa njengezimuli ngoba ntambama abantu bevela emisebenzini lasezikolo wonke umuntu uhle angene kunkundla zokuxhumana. Uthola ubaba womuzi eleyakhe ifoni, umama laye eleyakhe kuthi okungabantwana lakho kuyabe kuthe zwi kungena kiyo iWhatsApp, Facebook, twitter lezinye inkundla zokuxhumana ezitshiyeneyo.
Kuyinto enhle ukuthi inkundla zokuxhumana sezenze kwabalula kakhulu ukuxhumana labanye abantu yiloba bekuliphi icele lomhlaba. Okuhle ngalezinkundla zokuxhumana yikuthi umuntu kadingimali enengi ukuze enelise ukuxoxa labanye bakhe, kudingakala imali eyingcosana nje. Kodwa inye into esihluphile emizini yabantu nanko phela obaba labomama balwa mihla lemihla kubangwa imilayezo etholakala kuWhatsApp. Phela banengi abakubona kubalulekile ukuthi baphilisane labomkabo kodwa belabomakhwapheni eceleni.
Uthola indoda endala kumbe owesifazana osekhulile engasakhulumi lamuntu eselokhu ehlabahlaba ifoni yakhe. Lokhu kubangela ukuthi kube lokungathembani ezimulini nanko phela sesike sabala kumaphephandaba sabona lakubomabonakude amacala abantu abalwe baze babulalana kubangwa yona imilayezo eyabe itholakale kuWhatsApp. Bakhona asebabulala omkabo ngenxa yeWhatsApp le. Ngikhuluma nje kulenina elagwetshelwa ukuyapika ejele okweminyaka engu-17 ngoba libone imilayezo evela kudlalicatsha lomkalo laselibulala indoda.
Amanina ezindlini awasawethembi amadoda ngoba kuthiwa atshona ekuWhatsApp labomakhwapheni kumbe sithi amadlecatsha. Kulula ukukhuluma lomuntu yiloba siphi isikhathi kunkundla zokuxhumana kodwa kumele sinanzelele singazidilizeli imizi yethu kanye lobudlelwano bethu labantu esibathandayo. Minengi imitshado isephulwa ngenxa yokutholakale emafonini la. Okumqoka nje yikuthi abantu bazibambe, bafunde ukuthi ukubalazo lezi inkundla zokuxhumana akutsho ukuthi umuntu sokumele ahambe exoxa lowonke wonke edala ubudlelwano obungalunganga.
Kuqakathekile ukuhloniphana njengabantu abathetheneyo kungabi lozakwenza imithanithani yakhe kunkundla zokuxhumana okuzabangela ukuthi imizi ibhidlike. Kungakho-ke kungumbono kaMthunywa ukuthi abantu bazihloniphe baphinde bahloniphe abahleli labo emhlabeni ngokunanzelela ukuthi abathatheki ngenxa yokuza kwenkundla zokuxhumana lezi ngoba kulakho ukuletha ubuhlungu ezimpilweni zabantu abanengi.
