uMthunywa
UMPHATHISIKOLO ukhangelelwe ukuthi abe ngumuntu okhokhela isikolo ngendlela yokuthi abafundi kulesosikolo kanye labazali bambone eyisibonelo njalo bathathe inyathelo lakhe.
Kuyadanisa ukuthi umuntu ethi etheswe umlandu ongaka atshaphaze amandla awanikeziweyo ngokuzenzela santando. Abaphathisikolo abangazihluphi ngitsho ngempumela yemihloliso yezikolo abazikhokhelayo kufanele baziphendulele.
Kulezikolo ezinengi ezisemaphandleni minyaka yonke nxa impumela iphuma abantwana bayabe bengenzanga kuhle kodwa ubone umphathi engazihluphi ngitsho ngakho.
Abaphathi abanjalo kabazihluphi ngitsho lokuthi babize abazali babonisane ngendlela ezingenziwa ezingaphathisa ukuthi kuthuthukiswe impumela yemihloliso.
Umphathisikolo, ababalisi labazali kufanele bancedisane ukuthi abafundi bagxile ezifundweni zabo okuzenza lempumela yesikolo ithuthuke.
Kuyadanisa-ke ukuthi bakhona abaphathi bezikolo abathi lanxa abazali bekhanya bephathekile ngokuthi benze yonke imizamo esemandleni abo ukuze impumela yezikolo zabo ithuthuke bona bakutshaya indiva lokhu.
Isiminengi imibiko esibhalwe ngamaphephandaba ebika ngokungenzi kuhle kwezikolo ikakhulu ezisemaphandleni kodwa kungelanyathelo elithathwayo.
Umbuzo osuka ufikele abantu ngowokuthi kambe ukungathathi inyathelo kweziphathamandla zemawofisini ezemfundo lokhu kungabe kusitsho ukuthi balobudlelwano bani labaphathisikolo laba?
Thina njengabantu sikhangelele ukuthi amahofisi kaHulumende alalele izikhalazo zabantu njalo nxa kusiba lembiko yokungenzi kuhle kwezikolo kuthathwe amanyathelo okuba kungenziwani ngalezo zikolo ukuze kuthuthukiswe imfundo yakulezondawo ngoba kwezinye izikhathi kuyabe kubangelwa yikuthi umphathi kanye lequla lakhe lababalisi bayabe bengenzi umsebenzi wabo ngokupheleleyo.
Iziphathamandla ezisemawofisini akumelanga zamukele amanyala ayiwo enza ezikolo kungathi kusemahlangeni, kumele nxa abantwana bangenza kubi kumihloliso kuhlalwe phansi kuxoxiswane ukuze kube lomhlahlandlela wokulungisisa lolo hlupho.
Kungumbono kaMthunywa ukuthi kudingeka ukuthi abakhokhela emawofisini ezemfundo kumele bahlalise abaphathi bezikolo beme ngamazwane ikakhulu nxa kukhulunywa ngempumela yabafundi. Ngakho asingeke savuma abaphathi betshaphaza ilifa labantwabethu ngenxa yokuthi bona badlelana labantu abalamandla.
Siyakwazi ukuthi bonke abasemandleni bawetheswa ngabanye abantu lawomandla pho-ke kwehlulani ukuthi lowomuntu nxa esemsinda lawomandla bamethule ukuze kube lentuthuko?
