uMthunywa
ZINENGI izigigaba ezihlasimulisa umzimba ezenziwa ngosomabhizimusi labanye abathengisayo ukuze izinto zabo zithengwe. Okunye umuntu usuka azibuze ukuthi kambe liqiniso sibili, umuntu sengenza into enjalo? Asazi, kunzima okwenzakala lapha phandle, yikufuna imali konke lokhu, kodwa nxa kuliqiniso lokhu, abantu kababe lenhliziyo hatshi ukudlisa abantu ingcekeza.
Njengoba lisadliwa nje ihlobo, sitshayisana labo abathengisa indlubu, umumbu lokunye okuphekiweyo okuyabe kukhudumala. Inengi lihle likweqele.
Okubuhlungu abantu abathengisayo yikuthi uzathola umumbu sulamalanga amathathu uphekiwe ulokhu ukhudunyezwa kuphela suze wonakala, awucabangi ngozakudla ukuthi angaguliswa yilokho kudla kwakho? Yebo khona uyabe sulahlekelwe nxa sokonakele kodwa ngubani okumele adle ingcekeza?
Abanye njengoba bethengisa ngokungekho emthethweni ukudla futhi lezinsuku lokhansili etshinga ezitaladeni zakoBulawayo, nanko phela kathathi nje impahla zabantu uyabulala, abanye baze bafihle ezambuzini.
Ukudla esambuzini sibili? Phela lawe mthengi uthi sudle ukudla okunjalo uzayizwa intwabe yakhona, uphosa lokufa.
Kube lalaba abathengisa imibhida, hatshi bakithi, inditshi uyabe uyibona ukuthi le yayingeyokugezela, umuntu wazithathela wafaka imibhida yakhe wayathengisa.
Abantu kabahlanzeke bakithi, kuyathengwa njani ukudla kwakho nxa kungakhangeleki? Yikho-ke lapho omunye ubona engathengelwa seqala ukuganga, esikuzwayo kumbe liqiniso yini asazi.
Uzwe sokuthiwa uNaZibanibanyana nxa epheka umumbu wakhe ufaka isikhindi ngaphansi apheke konke ukuze kuthengwe, abanye omama kuthiwa bachela abakuthengisayo ngamanzi abageze ngawo ngaphansi.
Nxa kuyikho elikwenzayo bathengisi hatshi akelicabangele abanye abantu.
Wena kunguwe ungezwa njani udliswa ingcekeza enjalo. Akube ngabantu abazixoxelayo nje ukuthi yinto elizenzayo lezo ngoba nxa kuyikho elikwenzayo lizikhuze, isiqokoqela yikuhlanzeka ukuthi ibhizimusi ihambe hatshi imithi.
Asikhulumi-ke ngosomabhizimusi abalezitolo, bona ababulala abantu befuna izitho ezitshiyeneyo ukuze amabhizimusi abo aye phambili. Asizinukeni amakhwapha, sitshiye ukuganga ngoba sifuna amabhizimusi aqhele.
