uMthunywa
Sibuza kanje sidinga impendulo kulokhu esikubona kumemetheka emphakathini ngendlela abasakhulayo abaziphatha ngayo.
Siqale sisakhuza ngezidakamizwa esezihlanyisa abantwana, nanko sekuvela okunye ngokugwazwa komfundi wesikolo seFounders High koBulawayo.
Kwehle iyezi elimnyama kwenye imuli yakoBulawayo kulandela isehlakalo sokubulawa kwalumfundi ngomunye umfundi wesikolo seHamilton, ngoMvulo emini.
Sikhuluma nje indaba le isegudwini. Bakhuluma ngelibuhlungu abazali lababalisi ngesiga esitshiye phose lonke idolobho limangele.
Kambe abantwana besikolo bangenza into enje?
Kubikwa umufi uWayne Ndlovu wedlule emhlabeni ngokugwazwa ngengqamu ngesikhathi ezama ukulamula ukulwa obekukhona phakathi kwehlekana labafana beHamilton behlasela omunye umfundi weFounders.
Ngokuzwa kwephephandaba likazulu, abafundi bezikolo zombili bafungelana kudala ukuthi kuzahlala kuyimpi.
Okubangwayo akwaziwa.
Impi yabafundi le ayiqali lapha. Abazali abafunda ezikolo zemadolobheni bayazi ukuba ukulwa phakathi kwabafundi kwakuvele kukhona, kodwa kwakungafiki kuzinga lokubulalana.
Hamilton High school
Okwakujwayelekile yikubanga amankazana kumbe ukwethuselana okungela dlame olukhulu. Konke kwakukubi njalo lomphakathi wakugcona, kwadingwa amacebo okukuqeda.
Ngesikhathi sisathi sekwadlula, thutshu sekuvelile futhi.
Amapholisa koBulawayo athumele umbiko wokuthi asemanengi amacala adalwa ngabantwana besikolo. Ngaphandle kokuthanda ukusebenzisa izidakamizwa, kukhanya abafundi sebejayele ukulwa, betshengisela udlame olwengeziweyo.
Edolobheni ukulwa kwabafundi sikubona maviki wonke phakathi kwezikolo zeGifford High leMilton High. Bayagijimisana abafana nxa bephuma esikolo, uthole sebenyakazela lasemgwaqweni.
Egcekeni leCentenary Park uthola kunjalo, lamapholisa ayakufakaza ukuthi athwele nzima ukukhuza abafundi kulindawo.
Kulokhu, sithi isisusa sakho sivela ekuthini abantwana abasakhuzwa ngendlela efaneleyo.
Angeke umntwana aqhamuke esengothwala izikhali ezifana lengqamu ekilasini. Ingqondo zabantwana zibuthakathaka zidinga ukwalulekwa.
Ukwekela ukukhuza abantwana kudala umvuzo omubi. Umbalisi engabe etshona labantwana kodwa kungumlandu wakho mzali ukuhlala ukhangele indlela umntanakho aphila ngayo.
Ukulaywa komntwana kuqala egumeni. Bakhuzeni abantwabenu befika bevela esikolo. Libafundise ngengozi zokungaziphathi ukuze bazithobe. Lani liyazibonela bazali ukuthi umhlaba sumi ngezinyawo ngakho lingalingi liwuphe abantwana ngoba lizabaswela subaginyile.
Asiqapheleni bazali.
Abafundi labo abakhaliphe, bekele ukuphaphatheka emphakathini sengathi bayazi ukuthi impilo ihlelwe njani.
Inengi lenza ingozi liqabuke selisezandleni zamapholisa. Kwesinye isikhathi abanye basuka baphenduke amasela amakhulu, bagqekeze kube nzima.
Eqinisweni izakhamizi sezinanzelele ukuba abanye abantwana besikolo sebengamasela.
Abantwana bethu abananzeleli ukuba baziholela amanzi ngomsele ngokuphambuka kuzixwayiso zabazali lababalisi babo.
Bafundi, bekani amaphaphu phansi lizithobe.
