uMthunywa
ABANTU abaNsundu balenkolo ezinengi ezibasizayo kakhulu empilweni yabo yansuku zonke.
Phakathi kwalezinkolo, kulokholo lokuqiniswa komuzi.
Lelisiko belisenzelwa ukuthi abantu bakulowomuzi bavikeleke ezitheni loba kweminye imimoya engaqondanga.
Ngokuhamba kwesikhathi isiko leli selisiya lincipha ukulandelwa kwalo ngoba inengi labantu seliguqukele kukholo lwesiKhristu ngakho selikholwa ukuthi imizi yalo igcinwe nguNkulunkulu.
Ekuphileni kwethu kukanengi sisizwa ngokuthi imizi yesiNtwini eminengi yayiqiniswa ngitsho lalamuhla lokhu.
Sasike sizwe ukuba endaweni ezithile kukhithike abathakathi kubangelwa yikuba kuleyomizi kuyabe kubiywe ngomuthi onzima.
Kucina kusenzakala izigigaba kuleyomizi ngoba abathakathi bathi nxa bezoganga bafike bakhulelwe yizikhonkwane zakuleyo mizi okubangela ukuthi bacine bebanjiwe kumbe imizamo yabo ibhuluke.
Umbuzo obuzwa ngabanengi yikuthi kusasebenza na ukuqinisa umuzi.
Wona umuzi uvele uqiniswa njani?
Njengoba umhlaba uguquguquka, amasiko lawo aseguqukile ngakho indlela zokuqinisa imizi sezinengi kakhulu ngakho ziya ngemihlobo yabantu.
Kudala kwakuthiwa umuzi olungiswe kuhle sibili umthakathi uvele kaqumi kulowo muzi ngoba uthi nxa efika kuwo abone kukhazimula umuzi wonke aphandlwe ehluleke lokuthi aqhubekele phambili abesephenduka ayedanela kuleyomizi engaqinanga.
Abanye njalo kubikwa babethi bangafika kulowo muzi bangawuboni babone nje inkalakatha yesifula.
Lezinsuku lakho bakhona osiyazi kunye labaphurofethi abamemezela ukuthi bona bayenelisa ukuqinisa imizi.
Uvele uqiniswa ngani umuzi, nxa ungaqinisanga kubanjani njalo khona ukuqinisa umuzi kusasebenza na ngalezinsuku?
Inkinga esuka ibhekane lezakhamizi ezinengi yikuthi khonapho ngesikhathi besithi baqinisa imizi yabo bacina bebamba lokunye okungafanelanga.
Umuntu acine ebethelelwe isikhonkwane esizacina simhlupha kukanti yena ubesithi uzama ukuzivikela ezitheni.
Ezinye izinto ezifakwa ngabantu emagumeni abantu zicina zibaphendukela zibaqedele imfuyo loba abantwana.
Bakhona njalo abacatsha ngamabizo amabandla bazenze abantu benkosi abazama ukusiza abanye ukuthi bavikeleke kanti bona bagebhela izinto zabo emagumeni abantu basebezikhupha benze sengathi babambe umthakathi khona kuyinto yokwenziwa sabhayisikopo.
Ngenxa yokwanda kwenkolo kusuke kube ngumbuzo njalo ukuthi pho indlela yokuqinisa umuzi esasebenza yiphi.
YisiNtu kumbe yisiKhristu?
Kungumbono woMthunywa ukuthi ngaso sonke isikhathi izakhamizi zinanzelele abantu ukuthi ababacelayo ukuthi babalungisele imizi yabo baqotho ngoba lezinsuku sekugcwele inyanga kanye labaphurofethi bamanga abacina besipha abantu izinto eziyingozi ezingabalimaza zilimaze sibi sabanye abangazi lutho.
