uMthunywa
NGOLWESIHLANU amawayilesi azabe eduma kuze kungathi kungadabuka phansi laphezulu. Amakholwa ayabe ehaluzela ngenhliziyo ezimhlophe eqonda enkonzweni ezitshiyeneyo esiyamdumisa uThixo phela.
Okungokhekhe asikhulumi kuyabe kuziphaphela kepha yilo kanye ilanga lokugqoka impahla entsha kunathwa lamanamnede njalo njalo.
Kuhle lokhu sengathi amalanga wonke angahlala enjalo kodwa cha akwenzakali lokho kuhle siluthokozele usuku lokuzalwa kweNkosi uJesu ngenhliziyo zethu zonke ngoba phela lubuya kanye ngomnyaka.
Abanye bayabe benatha ezidakayo uthole umuntu esengohamba egcwala indlela yonke, konke lokhu akukubi ayidliwe imali kujatshulwe.
Izihlobo kanye labangane esabacina kudala phose umnyaka wonke sebephambi kwethu, kulamula umzimba oyabe usudiniwe umuntu engasenelisi ngitsho lokuwunyikinyisa.
Yiso isikhathi sokupha lokwamukela lesi. Pho laba abangela bangane lezihlobo abamukeli, abajabuli na?
Kubuhlungu ukuzibona intandane ezindlini ezigcinwe kuzo inengi lazo phela ngezalahlekelwa ngabazali zasala zingelabani ezingacatsha kuye.
Kubuhlungu njalo ukubona izalukazi ezathi ukondla abantwabazo labazukulu zisala zizodwa njalo zingela ozinakakelayo. Pho singanani isibusiso sokwelula isandla umuntu athenge ngitsho yiloba okuncane akwenelisayo ayekupha kulezindawo ezigcina abaswelayo abangela owokubagcina.
Kukanengi sibona ezinye inhlanganiso, abamabandla ezokholo atshiyeneyo besiya kulezindawo ukuyajabulela ikhisimusi lalaba abantu. Wena ke uqobo lwakho usuke welula na esakho isandla wanika abaswelayo.
Ibhayibhili lithi sibusisiwe isandla esiphayo kulesamukelayo.
Ngabanye bethu, phela elakusasa alaziwa kunengi okwabuthanisa ingane kulezi zindlu kanye lezalukazi kulezinhlanganiso. Angikholwa ukuthi ukhona loyedwa ongafuna ukuthi umntanakhe ayekhulela endaweni lezi kodwa-ke loba kunjalo impilo iyazenza.
Labo abasebenzela lezinhlanganiso ukugcina kunye lokunakakela lezingane sithi siyalihlonipha.
Akulula phela ukwenza lo umsebenzi kudinga umuntu olesineke lothando oluphindwe kabili, ngoba lo onhliziyo imfitshane ucina esetshiyile.
Ngakho-ke asibhekeni ilanga laphambi kwakusasa ngenhliziyo ezibanzi ezizakwenza sibone lathi sithande ukuyababona bejabula abaswelayo.
Kalifike lelolanga sijabule litshone njalo sijabula okungokhekhe bakithi asikukhangeleni kungadlali ngengozi funa litshone abantu sebebubula. Kulezinsuku kugcwele ama-fire crackers athandwa ngokhekhe kodwa ayingozi kungakho asilimukeni ukubakhangela.
Uzwa phela kuthiwa umntwana uselinyazwe yi-fire cracker kumbe usetshaywe yimota edlala duzane lomgwaqo kumbe njalo useka zibani ulimele engozini yemota kwathi imota athuzane layo kufe abantu abangaka.
Kuyadanisa lokho asikuvikeleni ngoLwesihlanu sijabuleni kuze kuthi ngempelaviki sivuke sikhuluma ngaleli langa.
Singakhohlwa njalo ukuxolelana sisitsho labo ababophelane inhliziyo.
Yiso isikhathi esihle lesi kungabe ngumngane kumbe njalo yisihlobo azithukululwe inhliziyo khona kuzalungiselelwa umnyaka omutsha kalula.
Thina-ke abakoMthunywa akula okunengi esifisela khona bantu bakithi ngaphandle kweKhisimusi enhle emnandi.
Kuzingane kanye labaswelayo asithokozeni ngokulutshwane esilakho sisazi ukuthi uSomandla uwavulile amehlo njalo uyasithanda.
Singakhohlwa okungokhekhe okuyabe kugqoke impahla ezintsha njalo esezidula phela nxa liyitholile lilenhlanhla lingakhohlwa ukubonga abazali nxa seliqhoba iziwiji lezo.
