uMthunywa
AMASIKO lemikhuba yesiNtu yikho okucazulula umuntu ukuthi ngumhlobo bani njalo ungowangaphi. Abantu bonke umhlaba wonke jikelele balemikhuba lamasiko abo kusiya ngokuthi indawo ingaphi, yiphi njalo ngeyabobani.
Kuqakathekile ukuthi abantu abahlala kulezo ndawo bahloniphe lokho okubethwe ukuthi kufanele kuhlonitshwe.
Esikweni lethu lesintu kulezakhiwo zemvelo esazalwa vele sathola kuthiwa ziyazila. Lezi yizakhiwo ezifana lentaba, imifula kanye lezinye imbalu.
Sokuvamile ukuthi sizwe ukuthi endaweni ezinengi indawo ezazihlonitshwa kazizahlonitshwa ngenxa yabantu abafika ezindaweni lezo bathathe kancane amasiko lamazilo endawo ezehlukeneyo.
Indawo ezinengi ezizilayo ngitsho labantu abangahlali kulezo ndawo bangafakaza ukuba ziyahlonitshwa ngoba kunengi abayabe sebezwe ngakho ngalezo ndawo kumbali elotshiweyo loba kungxoxo ezikhulunywayo.
Yebo kambe siyavuma ukuthi intuthuko kayilani lamasiko kanye lemikhuba yabantu kodwa kuqakathekile ukuthi inhlangothi zombili zibonisane ngalokho okufanele kwenziwe, abanye babethe izizatho zabo zizwakale kwabanye besekucetshwa indlela yaphambili.
Kukanengi kuvela imbiko yokuba amankampani atshiyeneyo ayahamba endaweni ezehlukeneyo bafike bazikhethele lapho abazasungula khona amabhizimusi abo bengazange bazihluphe ngitsho lokukhulumisana labakhokheli bomdabu kulezozindawo.
Kuke kwenzakala kuminyaka edluleyo koGodlwayo eFilabusi lapho okulenkampani eyafika yavula umgwaqo kwenye intaba ehlonitshwayo, uShamba. Ngesikhathi izisebenzi zaleyo nkampani zisenza lokhu kubikwa zazihlangana lezinto ezesabisayo njalo zikhuthwa yizikhova kanye lengqunqulu emini ilanga libalele.
Konke lokhu kutshengisa ukuthi inkampani le yayithinte indawo engathintwayo njalo ehloniphekayo.
Kuke njalo kwazwakala ukuba kulabantu abafika eNjelele labo benza imithanithani yabo bengazange bacele imvumo yokuyafika kule indawo.
Indawo lezi akusintaba mahlayana, zintaba zamasiko, ezilemikhuba ethile njalo zaziwa ngokuthi ngezabadala.
Ziyahlonitshwa intaba lezi njalo azihanjwa nguwonke wonke ngoba esintwini sikholelwa ukuthi izinto ezifana lendlala, ukuswelakala kwezulu kanye leminyeiminyama esigabeni ibangelwa yikungahlonitshwa kwendawo ezinje.
Bekulendingeko yokuthi abantu elizweni lonke jikelele batshengise ukuhlonipha kwabo amasiko lemikhuba yendawo zakithi ngokwenza imikhuba efaneleyo nxa kukhona okumele kwenziwe esigabeni.
Kungumbono kaMthunywa ukuthi yebo kambe kungabe kugijinyiswa amabhizimusi kunye lentuthuko ezigabeni kodwa kuqakathekile ukuthi nxa kulabantu abangena ezigabeni kuyebikwa endaweni zemikhuba kubikelwe abadala ukuthi labo bantu abangena esigabeni bazoletha intuthuko.
