uMthunywa
UHULUMENDE kuviki edluleyo usungule uhlelo oluzaphathisa abantu abanengi elizweni ukuthi babe lencwadi zokuzalwa, izithupha kunye lencwadi zokufa.
Ngaphansi kohlelo lolu ababhalisa incwadi lezi bazabe besebenza kusukela ngehola lesikhombisa ekuseni kusiya kwelesikhombisa njalo ntambama phakathi kweviki kuthi ngempelaviki bazabe besebenza kusukela ngehola lesikhombisa ekuseni kusiya kwelesine emini yantambama.
Abadala bathi inyoni zibanjwa zisemaphuphu kukanti amathole akhethwa kusakhanya ngakho-ke asigijimeni kusesemasinya ngoba inhlwa ibanjwa ngekhanda.
Abantwana abanengi behluleka ukuthi bafundiswe ezikolo ngoba bengalazo incwadi eziqondileyo ezibavumela ukuthi bangene esikolo kukanti lasebadaleni kuyafana lakho ngoba ukuze uqhatshwe zikhona incwadi okumele zivezwe.
UHulumende ukukhangele wakubona kuqondile ukuthi aphathise uzulu ekutholeni incwadi ezifana lezokuzalwa, izithupha kanye lezokufa ngoba zimqoka empilweni.
Zinengi izizatho ezibethwa ngabantu ezibenza bangabi lencwadi lezi eziqakathekileyo ezigoqela ukuthi kumele babe labafakazi abatshiyeneyo nxa kuyikuba lowo othatha isithupha usemdala kukanti-ke nanti ithuba elihle lokuthi abangelazo incwadi lezi babelazo ngoba abathathisa incwadi lezi bazabe bekhona ngitsho lemalokitshini ukuze abantu bathathe incwadi lezi.
Siyambonga uHulumende ngokunika uzulu ithuba lokuthi abe lencwadi eziqakathekileyo kukanti ingqobe isisalele umphakathi ongelazo lezincwadi ukuthi asukume aye lapho okubekwe lezindawo zokuthatha lezincwadi ukuthi ayethatha angelazo.
Kukanengi abanye beswela imisebenzi kukanti abanye abantwana bacina besehluleka ukuphatheka kumincintiswano yemidlalo kanye lokubhala imihloliso ngoba bengelazo incwadi lezi uHulumende asethe abantu bangazithatha.
UHulumende usungule uhlelo oluphathisa umphakathi ukuthi athole incwadi lezi. Umsebenzi lo uqhubeka ilizwe lonke nje jikelele ngakho-ke kungumlandu wethu ukuthi sithathe incwadi lezi ezililungelo lethu ngokuba yizizalwane zakuleli esititshini sakini.
Inengi labantu abahlala emaphandleni abalalo ulwazi oluqotho ngokuqakatheka kokuthathisa abantwana incwadi zokuzalwa. Bonke abaqeqetshi esihlangana labo nsukuzonke abaphezulu labo baqala phansi ngokuthatha incwadi zokuzalwa kusiya kusiya.
Uhlupho ebantwini abahlala emaphandleni yikuthi abakwazi ukuqakatheka kokuthatha incwadi zokuzalwa njalo kwesinye isikhathi bayayekela ukuthathisa abantwana incwadi lezi ngoba bevilapha ukuhamba imango emide besiya lapho incwadi lezi ezithathwa khona.
Wonke umuntu ulelungelo lokuthola incwadi yokuzalwa, isithupha kanye leyokufa nxa esethe wedlula emhlabeni.
Incwadi lezi ziqakathekile lakuHulumende ngoba ziyamncedisa ukwazi ukuthi kulabantwana abangaki elizweni, lokuthi abadala labo bangaki kanye lalabo abafayo ukuthi bangaki. Ukuba kwazi inani labantu kuyaphathisa njalo uHulumende ekulungiseleni kumbe ekudingeni ukudla kwabantu nxa kuyikuthi kulendlala elizweni lokunye okuqakathekileyo ekukhokhelweni kwelizwe.
Kungakho kungumlandu wethu sonke ukuthi sibe lencwadi lezi ukuze saziwe ngokusemthethweni.
Labo abathathisa incwadi lezi bazabe begcwele indawo zonke akutsho ukuba abasoze babuze imibuzo ekuthatheni kwakho. Lezi zincwadi eziqakathekileyo kakhulu ngakho-ke ngezake uzithole ungazange uphendule imibuzo embalwa ngoba bakhona abangayathatha incwadi lezi ukuze bazisebenzise ukuganga.
