uMthunywa
IBHAYIBHILI elingcwele likubeka mgceke ukuthi abantwana yisibusiso esivela kuNkulunkulu ngakho ke kuqakathekile ukuthi zonke izipho ezivela kuNkulunkulu zihlonitshwe, zithandwe kanti njalo zinakekelwe.
Kulusizi ukuthi bakhona abanye abantu abalesibindi sokutshaphaza isiphiwo esifana lomntwana. Ngeviki edluleyo uMthunywa ubequkethe udaba lwenina lePumula koBulawayo elibelethe laselitshila usane lwafa lwalungcwaba egumeni.
Kuyethusa ukuthi umuntu wesifazana ngemva kokuthwala umntwana okwenyanga eziyisitshiyamunwe munye kulokuthi amthande njalo amnakekele yena uba lesibindi sokubulala umntwana lo ngezakhe izandla aphinde agebhe igodi amngcwabe. Kuyamangalisa ukuthi umuntu obekhanya ezithwele njalo ebonakale ehelelwa athi nxa ebuzwa ukuthi umntwana ungaphi athi ubengazithwalanga.
Izinto ziyatshintsha sibili. Omama baziwa njengabantu abalesihelo njalo ababekezelayo, pho laba abalezibindi zokubulala lokulahla abantwana ngabafazi abanjani, sona isihelo balaso na? Kulabanye njalo abalomkhuba wokuyakhalala abantwana kuboyise. Kambe umuntu nxa ezakuyatshiya umntanakhe ukuthi akhuliswe ngomunye umfazi kusasa angasola omunye umuntu nxa umntanakhe engasakhuliswanga ngendlela? Yena umntwana uyabe evele engena ngaphi kungxabano yomuntu lejaha lakhe?
Abanye omama bavika ngokuthi impilo inzima ngakho ukukhulisa umntwana ongelayise yikuzokhela amalahle ekhanda. Asali sibili ukukhulisa umntwana uwedwa kunzima ikakhulu nxa ungasebenzi khona sibili loba usebenza kunzima ukukhulisa umntwana kodwa lokho akukuphi ilungelo lokulahla isiphiwo esivela kuNkulunkulu.
Nxa singadingisisa, inengi labantu likhuliswe ngonina, oyise alizange livele libabone kodwa lamhlanje yibo abagcine onina njalo onina baziqhenya ngabo. Kuqakathekile ukuthi labo ababulala abantwana bazi ukuthi konke esikwenzayo kulomvuzo. Ukulahla umntwana akuqedi dubo ngitsho lakancane kodwa kuyengeza indubo ngoba unembeza uzahlala ekhathazekile.
Abantu bayakhohlwa ukuthi kulabanye abantu abacela kophezulu ukuthi abanike isibusiso sabantwana kodwa kungenzakali.
Kungumbono kaMthunywa ukuthi ngabe abasakhulayo bayaziphatha batshiyane lezemacansini nxa bengakazimiseli ukuba labantwana kulokubulala abantwana ngendlela efana lale ephume kuphephandaba leviki edluleyo.
Kubalulekile ukuthi abantu nxa sebefisa ukuba labantwana babahlelele ukuze kusasa bangacini bedala amacala okubulala.
Sikhuthaza njalo uhulumende ukuthi afake izijeziso eziqinileyo kulabo abazatholakala bebulala abantwana, abakhupha izisu kanye lalabo ababaphathisa ekukhipheni lezo zisu inyanga, odokotela kanye labomongikazi.
