uMthunywa
INANI labantu abedlula emhlabeni ngenxa yesifo seCovid-19 liqhubeka likhuphuka nanko phela ngoMvulo mhlaka 12 Ntulikazi kufe abantu abangu-51 kuleli.
Phakathi kwenani leli, abantu abafe edolobheni lakoBulawayo kuphela liku-11.
Abantu abatholakale belomkhuhlane lo, ngoMvulo bangu-2 661 njalo bonke ngabantu abangazange baphume kuleli.
Abantu bonke asebetholakale belomkhuhlane lo kusukela ngesikhathi uqala ukubonakala kuleli sebengu-70 426 kukanti sekufe abangu-2 236.
Isabelo seMashonaland West yiso esilenani eliphezulu nanko phela kufe abantu abangu-13 kulandela koBulawayo lapho okufe abantu abangu-11. EHarare kunye leMidlands kufe abantu abangu-9 kusabelo ngasinye.
EMatabeleland South kufe abantu abane, eMasvingo ababili, kukanti eMashonaland East leMashonaland Central kufe umuntu munye kusabelo ngasinye.
Kusitatimende sogatsha lwezeMpilakahle kunye lokondliwa kutsha kwabantwana, mhlaka 12 Ntulikazi ngehola lesithathu ngemva kwemini enkulu, bekulabantu abangu-753 abalaliswe ezibhedlela ngenxa yomkhuhlane lo, abatsha bebengu-90. Abangu-28 bebelapho okulabagula khona kakhulu, ku Intensive Care Unit kuthi abangu-439 besebephephile engozini.
