uMthunywa
Cornelius Luphahla
ZIBUKELE ibhayikopo yamahala izakhamizi zesigabeni seZimnyama ePlumtree ngemva kokuba omunye umbalisi weZimnyama Primary School ebhuqwe kabuhlungu ngumkakhe bebanga ukuthi ubesehlanyisana lomunye umbalisikazi njalo kulesisikolo.
Isiga lesi senzakale ngoLwesibili kuviki ephelileyo lapho uNkosazana Sandile Ncube abhaxabule khona umkakhe uMnumzana Trevor Moyo ngembiza phambili kwabanye ababalisi bebanga ukuba ubesethandana lo Nkosazana Gracious Ndlovu.
Kuzwakale ukuthi uMnu Moyo kanye lomakhwapheni wakhe lo, uNkszn Ndlovu bangababalisi abangakaqedi izifundo zabo eJoshua Mqabuko Nkomo Polytechnic eGwanda okuyikho okucatshangelwa ukuba babonana khona.
UMthunywa ukhulumisane loNkosazana Sylvia Thwala oyisakhamuzi kule indawo wachaza ukuthi kwaba yisiphansi phezulu ababili laba bebanga itshamali.
“Sibambe oluphuphumayo uMaNcube efuna ukuqeda uMoyo.
Sizwe sokungumsindo esikolo ntambama sagijima sathola uMoyo sewele phansi emnyango wekilasi umkakhe emtshaya ngembiza.
“Safika sambamba uMaNcube samthathela uphini ayetshaya ngalo umkakhe olwasoluqamukile kwaba yikho ukusila kuka Moyo. UMaNdlovu yena ubesetshotshobele efasiteleni lekilasi ngithemba ubelindele ukuthi uMaMoyo engamlanda uzahle aphume abaleke,” kutsho uNkszn Thwala.
Omunye wababalisi bakulesisikolo ongathandanga ukubethwa ngegama uveze ukuthi indaba le yabethusa kakhulu ngoba uMnu Moyo watshayelwa ekilasini elomakhwapheni wakhe lo.
“Into eyangimangalisa kakhulu yikuthi uMoyo watshayelwa ekilasini khonapho kusebusuku elomakhwapheni wakhe lo. Asazi ukuthi babedingani kumbe babesesaba ukuthi uMaNcube engathutsha abathole endlini njengoba wayengekho ekoBulawayo.
“Ngokubona kwami uMoyo wayesazi ukuthi umkakhe uyamehlula ngakho wayengathandi ukuthi amthole loMaNdlovu endlini yikho wakhetha ukuyahlala ekilasini kumnyama,” kuveza umbalisi lo.
Ekhuluma loMthunywa uMnumzana Sabelo Mabhena uveze ukuthi uzwa ubuhlungu ngesenzo esenziwe ngumbalisi lo.
“Thina njengezakhamizi sizwa ubuhlungu ngesenzo esenziwe ngumbalisi lo ngoba uthethe ikilasi esayakhela abantwabethu yena uyiphendula indawo yakhe yokuhlala lesithandwa sakhe. Asazi ukuthi bafundisani abantwabethu nxa besenzenje,” kutsho uMnu Mabhena.
Imizamo yokukhulumisana loNkszn Gracious Ndlovu yehlule ngoba kazange walubamba ucingo lwakhe lakuWhatsApp kazange waphendula.
UNkosazana Sandile Ncube ebuzwa ngale indaba uvumile ukuthi waxabana loMoyo wala ukulandisa ukuthi kwahamba njani.
“Kuliqiniso ukuthi ngaxabana loMoyo kodwa ngeke ngikhulume lutho ngalokhu yimfihlo yami,” kutsho uNkszn Ncube.
Ebuzwa ngokubhuqwa kwakhe lokhu uMnu Moyo walile ukuphendula wacitsha umakhalekhukhwini wakhe.
