uMthunywa
Izihlobo zomntwana oleminyaka emihlanu nje kuphela yokuzalwa zimangele lapha ephenduka ngekhaya evela esikolo eselamanxeba opha igazi. Isimanga yikuthi umntwana usuke kuhle ekuseni elubhekise esikolo kodwa waphenduka eselimele eShoshanguve, indawo eseTshwane kweleSouth Africa.
Unina womntwana uCharity Mthimunye (23), uthi uvalo lumtshaye lwameqa ebona umntanakhe ephenduka endlini ekulesosimo. Umntwana uveze ukuthi utshaywe ngumbalisi esikolo ngoba ezichamele esikolo.
UMthimunye uthe umntwana usuke ngekhaya engalimalanga ngitsho nanko phela nguye omgezisileyo. Uthe esephendukile endlini ubeqhunsa isililo esizwa ubuhlungu obumangalisayo.
“Ngithe ngifika esikolo somntwana ngidinga impendulo akekho ovumileyo ukuthi nguye olimaze umntanami.
“Ngokuya kwesikhathi ukhona ocine engincweba indlebe ethi umntwana ubhaxabulwe ngesamboko phambi kwabanye abantwana ngoba ehluleke ukuya endlini encane kuseselesikhathi wasezichamela.”
Uthe uthethe umntwana wamusa kodokotela ofike wathi kabaye esibhedlela.
“Umntwana uyehluleka ukuhlala kuhle, lokulala kasalali ngoba uzwa ubuhlungu.
“Ngifuna umbalisi wakhe axotshwe umsebenzi ngoba ungilimazele umntwana. Kumele abotshwe, ngumuntu onjani otshaya umntwana kanje?” nguMthimunye lo.
Iphephandaba leDaily Sun lixoxe lomnikazi wesikolo uNkosikazi Flora Kgapola, wavuma ukuthi ngempela umntwana ulimele esikolo.
“Umntwana ulimele esikolo sibili kodwa katshaywanga kodwa ugeziswe ngebleach ngomunye wezisebenzi zesikolo, lami nginje ngithukuthele ngalokhu okwenzakeleyo.
“Ngiyaxolisa ngalokhu okwenzakeleyo.”
Umqondisi wenhlanganiso ebona ngezokuvikelwa kwabantwana iChildline uNkosazana Lynne Cawood uthe kulusizi ukuthi kusesekhona ababalisi abalokhu betshaya abantwana.
“Abazali kumele baphange bamangalele ababalisi abenza kanje kithi ukuze lathi sisize ngokucebisa umntwana.
“Isikolo lesi sokumele sicubungulwe ngoba lokhu okwenzakeleyo kungabe kungayisikho kwakuqala njalo mhlawumbe omunye umntwana laye angacina ephatheka kubi njengalo esikhuluma ngaye.”
Amapholisa asayicubungula lindaba — Ubulembu
