uMthunywa
Nomthandazo Ndlovu
KULEJAHA lesigabeni seShashi eBeitbridge elibhuqwe nguzulu kulandela ukutshontsha inhlanzi qede layitshwathika esikhindini.
UTalent Mhlanga utshontshe inhlanzi kwesinye isitolo kuviki ephelileyo wayitshwathika esikhindini wazihambela kanti kabuzanga elangeni ngoba ukhona obembonile esenza lokhu.
Ekhuluma loMthunywa uMnumzana Brilliant Nyathi ongunogada njalo kunguye owananzelela ukuthi uMhlanga utshontshile uthe kalankani ngesenzo sikaMhlanga ngoba inhlanzi ayitshontshileyo ibinkulu kakhulu ukuthi sengayifaka esikhindini.
“UMhlanga ulesibindi shuwa, mina ngambona ebuya amaphambili akhe emakhulu ngasola ukuthi loba kuthiwani kulento ekhona ayifakileyo lapho, ngambuza ukuthi kuze kukhukhumale kangaka phambili kutheni yena wangivala ngolaka wathi ngingena ngaphi ngokukhukhumala kwamaphambili akhe,” kutsho uMnu Nyathi.
“Lokhu kwenza ngasola ngacina sengimhlola ukuthi angabe engebanga yini, ngimangele ngithola kule-bream eliqanda mo phakathi kwesikhindi, uzamile ukubaleka kodwa bengimbambile salwisana sibili kwaze kwangenela abantu,” kuchaza uMnu Nyathi.
UMnumzana Edward Dube owayekhona uMhlanga ebanjwa uthe indlela atshaywa ngayo kakholwa ukuthi uzaphinda ebe futhi empilweni yakhe.
“Umama kaMhlanga ngumuntu ozidonsela nzima empilweni njalo ngumuntu owaziwayo esigabeni ujayelene labantu abanengi yikho bengambophisanga, kodwa ukutshaywa utshayiwe sibili ungabona etshontsha futhi uyabe eloyiwe, kambe umuntu sengahamba ejele ehambela inhlanzi kuphela?” kutsho uMnu Dube.
Ebuzwa ngodaba lolu uMnu Mhlanga uvumile ukuthi watshontsha inhlanzi njalo kakwazi ukuthi wayengenwe ngumoya bani.
“Yebo, liqiniso sibili ukuthi ngabanjwa ngitshontshe inhlanzi, kodwa ngangingafakanga esikhindini yayisesikipheni, ngangizama ukuthi ngincedise umama ngoba uthwele nzima ukusigcina ekhaya,” kuphetha uMnu Mhlanga.