uMthunywa
Cornelius Luphahla
NGENXA yobukhwele kulenina leMathetshaneni elibhuqe umzukulu walo ebelithandana laye ngomphini wehloka ngoba esethandana lelinye inina, uMthunywa ukuzwile lokhu.
Isiga lesi senzakale kunyanga ephelileyo lapho uNkosazana Charity Ndlovu athole khona uEdwin Sibanda ongumzukulu womkakhe, uSamuel Sibanda ezincindela uluju lwemvelo loLindani Nkomo emzini kaIsaac Mlotshwa wababhula ngomphini wehloka.
UMnumzana Methuseli Bhebhe ongesinye isakhamuzi sakule indawo ubikele intatheli ukuthi uNkszn Ndlovu wayeselesikhathi eside ethandana lomzukulu wakhe.
“UMaNdlovu waqala kudala ukuthandana lomzukulu wakhe wakhuzwa yizihlobo zomkakhe kwehlula. Ngikhuluma nje khathesi abantwana ababili alabo kucatshangelwa ukuthi wabazala lomzukulu wakhe lo njengoba umkakhe ehlala engekho,” kutsho uMnu Bhebhe.
Uqhubekele phambili walandisa ngokutshaywa kukaSibanda losomoya wakhe.
“UMaNdlovu esenanzelele ukuba kukhona okutshaya amanzi phakathi komzukulu wakhe loLindani wasuka kwelinye ilanga ebusuku waqonda lapho okwakusebenza khona uLindani. Wathi efika wangena endlini eyayilala uLindani wabathola bezikholisela uluju lwemvelo wahle wabasukela ngomphini ayewuphethe.
“Thina sezwa sokungumsindo phakathi kwamabili njengoba koMlotshwa kukomakhelwane sagijima sathola abantu sebembambile uMaNdlovu esidla ubhedu. Sathi simbuza wathi yena uzwa ubuhlungu ngoba umzukulu wakhe ubengasamvakatsheli ntambama kanti seganga,” kulandisa uMnu Bhebhe.
Kubikwa ngemva kokubhuqwa kwezithandani lezi uMnu Mlotshwa wabikela usobhuku indaba le okwadala ukuthi uMaNdlovu ahlawuliswe inkomo kuthiwa ngeyokugezisa umuzi kaMlotshwa awungene ebusuku. Ngemva kwalokho uMnu Sibanda wahle wamxotsha umkakhe wathi kayekwenda kumzukulu wakhe, laye kazange athandabuze wahle wayahlala laye.
UMnumzana Isaac Mlotshwa ebuzwa ngale indaba uvumile ukuba yenzakala emzini wakhe.
“Kuliqiniso sibili ukuba indaba le yenzakala emzini wami njalo yimi engathi uMaNdlovu ahlawule inkomo yokungena emzini wami ezokulwa ebusuku. Kwangicaphula kakhulu sibili ngahle ngaxotsha loLindani noma nje wayesebenza kuhle,” kutsho uMnu Mlotshwa.
Usobhuku wakule indawo uMnumzana Patrick Ncube uvumile ukuba icala leli lathoniswa kuye.
“Kuliqiniso sibili ukuthi uMaNdlovu wamiswa edale ngokungena emzini kaMlotshwa ebusuku esiyakulwa, wahlawula inkomo yokugezisa umuzi ngemva kwalokho wayakwendela kumzukulu wakhe lo,” kuphetha uMnu Ncube.
