uMthunywa
Cornelius Luphahla
ZIMASWABI izakhamizi zesigabeni seMatshabeleni eNsuza ngemva kokuba esinye isakhamuzi sakule indawo sixotshe umalukazana waso sathi kafanelanga umntanaso ngoba uthanda amasi kakhulu.
Indaba le yenzakale kuviki ephelileyo lapho uMnumzana Sabelo Dlamini axotshe khona umalukazana wakhe uNkosazana Nokuphila Ndlovu othethwe nguNison Dlamini ethi semhluphile ngokumqedela amasi.
UMthunywa ukhulumisane loNkosazana Sakhile Ndlovu umnawakhe kamalukazana lo oxotshiweyo wathi udadewabo waxotshelwa amasi angazange wawadla.
“Ubabazala waxotsha udadewethu ethi nguye oqeda amasi akhe khonapho edliwa ngabantwana. Ngalelolanga udadewethu wathatha amasi wawanika abantwana ngoba babengela sitshebo ngemva kwalokho ngezwa ubabazala etshinga ethi amasi akhe sesiwadlile lodadewethu.
“Noma ngazama ukumchasisela ukuthi kuhambe njani kodwa kazange wakulalela lokhu wathi udadewethu kaphume emzini wakhe kasamfuni, yikho ke okwadala ukuthi siphume sihambe,” kutsho uNkszn Ndlovu.
Ebuzwa ngale indaba uNkosazana Nokuphila Ndlovu wachaza ukuthi kakwazi ukuthi uyisezala wamxotshelani ngoba wayengakadli uchago ngokomkhuba.
“Mina kangikwazi ukuthi ubabazala wangixotshelani ngoba wayesazi ukuthi kangikadliswa uchago lwakwethuzala ngokusemthethweni. Asazi ukuthi uthi ngaludla njani. Engikwaziyo yikuthi uchago lolu ngangilupha abantwana ngoba bengelasitshebo.
“Ngokubona kwami abakwethuzala babengasangifuni njengoba umkami engekho eseSouth Africa. Kutsho ukuthi babona ukuthi wayengasathumezi kuhle impahla yikho bangixotsha,” kuveza uNkszn Ndlovu.
UNkosikazi Siduduzile Dlamini onguninazala kaNkszn Ndlovu ebuzwa ngale indaba uthe umalukazana wakhe kabamxotshanga khona bezamlanda bayekhulumisana laye.
“Mina umalukazana wami ngiyamthanda njalo kangizange ngamxotsha kangazi ukuthi bakhulumisana njani loyisezala ngoba mina ngangingekho. Ngokunjalo ngizayakhulumisana laye ukuthi aphenduke ngoba kasilamvumo yokumxotsha umkakhe engakwazi njengoba engekho,” kutsho uNkkz Dlamini.
