uMthunywa
Cornelius Luphahla
KULOMALUKAZANA wesigabeni seDlawa eNkayi otshiye izakhamizi zakule indawo zibambe owangaphansi ngemva kokubhaxabula aze ephule uninazala isandla kubangwa ubulivila.
Lesisiga senzakale kuviki ephelileyo lapho uNkosazana Sicelo Tshuma abhuqe khona uNkosazana Thandiwe Dube ngophini waze wamephula ingalo ethi uyamthethisa ngokuthi ulivila.
Intatheli kaMthunywa ixhumane lesinye sezakhamizi zakule indawo uNkosazana Yolanda Ncube oveze ukuthi laye wathola uMaDube sephuke ingalo.
“Mina ngezwa umsindo koMaDube ntambama ngagijima ngaqonda khona ngathi ngifika ngathola uMaTshuma ephezulu kukaninazala emtshaya ngophini lalo soluze lwaqamuka. Ngazama ukulamula kodwa ngaze ngancediswa ngabanye omakhelwane abafikayo,” kutsho uNkszn Moyo.
UNkszn Moyo uqhubekele phambili njalo wachaza ukuthi bathi bembuza ukuthi kungani etshaya uninazala wathi uhlala emthethisa ethi ulivila.
“UMaTshuma sathi simbuza ukuthi kungani etshaya uninazala wathi sekhathele ngoninazala ngoba uhlala emthethisa nsukuzonke ethi ulivila khonapho kunguye omlimelayo abuye amphekele. Ngemva kwalokho sathatha uninazala samusa esibhedlela seSt Luke’s,” kuchaza uNkszn Moyo.
Ebuzwa ngale indaba uNkszn Tshuma uchaze ukuthi okwenza watshaya uninazala yikuthi wayesezonde kakhulu njalo waphambanisa.
“Mina okwenza ngatshaya umamazala yikuthi ngasengicaphuke kakhulu ngoba umamazala ugcinwe yimi njalo konke ukwenzelwa yimi kodwa uyangithethisa nsukuzonke ethi ngilivila.
“Ngalelolanga wangithethisa kakhulu ngathi ngimphendula wangitshisa ngesikhuni yikho ngamtshaya. Noma nje ngamtshaya kodwa sengizisola ngoba ngaphambanisa ngokumtshaya,” kuveza uNkszn Tshuma.
Omunye wabantwana bakaMaDube uNkszn Samukelo Moyo uchaze ukuthi uzwa ubuhlungu kakhulu ngokutshaywa kukanina ngumalukazana wakhe.
“Ngizwa ubuhlungu obukhulu ngokwephulwa kukamama ingalo ngumalukazana mina nginje ngingazake ngimtshaye umama. Ngeqiniso umalukazana lo uyadelela sibili kutsho ukuthi udelela umdeni wakoMoyo.
Khathesi umama usesibhedlela ngenxa yakhe sesitshiye imisebenzi yethu sazomlinda yena ezihlalele ekhaya,” kutsho uNkszn Moyo.
Usobhuku wakule indawo uMnumzana Artwell Ndlovu ebuzwa ngale indaba uvumile ukuthi uyayazi.
“Kuliqiniso sibili ukuthi kulomalukazana owatshaya wephula uninazala ingalo khonapha esigabeni sami.
Amapholisa athi uMaTshuma abhadale imali zesibhedlela ngemva kwalokho babuye kimi azohlawula,” kuphetha uMnu Ndlovu.
