uMthunywa
Nobuhle Mgwaqo
UMBIKO wokwedlula emhlabeni kwentatheli yephephandaba likazulu, uMthunywa uCornelius Luphahla wethuse intathelizindaba kanye lozulu endaweni ezitshiyeneyo ngoba kufike njengesela elizotshontsha, akukho ngitsho loyedwa obekulindele.
Ukufa “kukaMlisa” “uLuphahla” “okaNdaba” okuyiyo indlela abethanda ukuzibiza ngayo; kube yikwehla kweyezi elimnyama elisingathe inhliziyo zabanengi ikakhulu kumuli yeZimpapers koBulawayo, abeYunivesithi aqeqetsha kuyo iLupane State University kanye labantu abanengi abaziqhenya ngamasiko eSintu.
ULuphahla obeyimbongi, ingcitshi kwezamasiko, isazi sembali kaMthwakazi, kanye lentatheli wedlule kulumhlaba ngeSonto emini.
UMfokaLuphahla wazalwa ngomnyaka ka1992 ngenyanga kaZibandlela mhlaka 13 esigabeni seMafa, eLupane lapho akhulela khona. Wenza izifundo zakhe ezikolo ezehlukeneyo kule indawo. Uqeqetshe kumfundo yaphezulu nyakenye enyuvesithi yeLupane lapho abesenza izifundo zolimi. Bekulithemba kunengi labantu ukuba njengoba ebethanda isintu ukuqeqetsha kuzifundo lezi kuzamphathisa ekuthuthukiseni isizwe sikaMthwakazi kodwa konke lokhu kube yizifiso nje eziphelele emoyeni.
ULuphahla ngiqale ukumazi ngomnyaka ka2015 lapho afika ezofundela umsebenzi wokuba yintathelizindaba kwaze kwafika ekudluleni kwakhe kulo umhlaba.
Ubeyindoda eziqhenya ngemikhuba kanye lamasiko ayo kaMthwakazi njalo ubelesifiso sokuba uzulu wonke okulo umhlubulo welizwe aqhubekele phambili egodle njalo ezigqaja ngamasiko akhe ayiwo abambanisa isizwe sikaMthwakazi.
Njengentathelizindaba ubeyindoda elesibindi enza umsebenzi wayo ngobuqotho kanye langokuzinikela okukhulu. ULuphahla ubesezakhele udumo emsebenzini wakhe ngokubhala ikakhulu ngabahlabeleli, imbongi kanye labalobi bakithi abasathuthuka. Ubebhala njalo izindaba ezehlukeneyo ngezigigaba ezenzakala endaweni ezitshiyeneyo ngobunono obukhulu.
NgeSonto ntambama umbiko wokufa kwakhe uthe usabalala kunkundla zokuxhumana, kube nzima ukuthi ngikukholwe ukuthi ngempela usedlule emhlabeni uLuphahla. Akuzange kubenzima kimi ngedwa kodwa labanye abantu abebetshaya incingo befuna ukuzwisisa ukuthi lokhu abakuzwayo kungabe kuliqiniso loba cha. Lanxa bekuyisifiso sethu ukuthi umbiko lo ube ungamanga kodwa beselehlile ngempela iyezi elimnyama, ubesethule okaLuphahla.
ULuphahla uthethe inhliziyo zabanengi ikakhulu ngolwazi lwakhe kwezesintu ngohlelo lwakhe kuMthunywa uSigiya Ngoludala lapho abechokola khona ngemikhuba eyayiqhutshwa ngoMandulo kuzigaba ezehlukeneyo zempilo kusukela ekufuyeni izifuyo njengoba okhokho bethu babefuyile, ekukhuliseni abantwana, ekuphembeni umuzi, ukuphatha imizi kanye lalapho sekucelwa izulu kwabaphansi. ULuphahla ubetshaya kuzwele lanxa ebeseseyindoda esakhulayo ubone amadoda amadala enqekuza amakhanda ngenxa yolwazi abelalo. Ubengumthombo wolwazi ngempela kwezamasiko.
Kulusizi ukuthi uhambe lolwazi lwakhe njengoba nje abadala bethi udwayi ufa lensiba zakhe. Kungakho-ke inye kuphela indlela yokukhumbula kanye lokuhlonipha uLuphahla labanye asebadlula kulo umhlaba ababezinikele ekuvuseleleni amasiko; yikuthi siqhubekele phambili sifundisa intsha ngobuhle bamasiko ethu kanye lokuzigqaja ngobuyithi bethu.
Sithi lala ngokuthula kaNdaba, silahlekelwe kakhulu kuphephandaba likazulu kanye lasemsebenzini wethu njengentathelizindaba.
