uMthunywa
Nkosilathi Sibanda
AKULA mqeqetshi webhola likanobhutshuzwayo ongafuni ukudlala enkundleni zeChampions League.
Ukuphatheka kulesi isigaba somdlalo kukhweza idlabuzane njalo kuphakamisa lesisindo somsebenzi walumqeqetshi leqembu lakhe.
ULizwe Sweswe, obeyibambe esihlalweni sobuqeqetshi kuFC Platinum kusizini edluleyo, wenelisa ukuphakamisa inkezo yeCastle Lager, waqhubeka ekhuza lakuCaf Champions League, ubike ukuba ulinde ngamehlo abomvu ukuthi iqembu lakhe lithole imiklomelo.
“Ukudlala kulesi isigaba kungivule amehlo, kwangenza ngaba lombono omutsha ngomdlalo wenguqu. Imincintiswano yeChampions League yehlukile okumangalisayo, okuyikho okuzenza iFC Platinum iphenduke ekhaya iliqembu elitshisayo.
“Ngifisa ukuthi kumidlalo eseleyo sibuthe imiklomelo. Kulithemba lami ukuthi sithole ngitsho lomdlalo owodwa esingawunqoba, siphethe umkhankaso wethu sihlonitshwa kuqula esikulo,” kutsho lumqeqetshi.
Abafana be-Pure Platinum Play bakusigaba se-mini league yeCaf Champions League. Kuqula lamaqembu elilwisana lawo kule-Al Ahly, iEtoile du Sahel leAl-Hilal Omdurman. Ithimu kaSweswe le ihlezi ekucineni kwengalane iphethe umklomelo owodwa eyawuthola mhla isiba ngutshiki lobhanqa 1-1 leqembu le Al Ahly eMagumeni ngoMgqibelo.
Kungalane le, ephezulu yiEtoile du Sahel elemiklomelo eyisitshiya galo lunye, ilandelwa yiAl Hilal Omdurman ele-6, iAl Ahly iphethe eyisikhombisa.
Ithemba lokuyaphambili kuqembu leFC Platinum selinciphile njalo loSweswe uyavuma ukuthi loba eyifuna ngabomvu imiklomelo, sekusobala ukuthi sebephumile emncintiswaneni.
Kusenjalo, ukaputeni weFC Platinum uPetros Mhari ukhulume lephephandaba likazulu ngemva komdlalo wabo leAl Ahly wathi sebethole ulwazi ngokudlala kuligi yentshantshu ze-Africa.
“Sifunda okunengi njalo ukuhlala sidlala kanje kusenza silungiselele lemidlalo yakuleli kalula.Ukuba yingxenye yeqembu elikuChampions League kuyasikhuthaza ukuthi siphakamise umdlalo wethu.”
Izimbamgodi zeFC Platinum zimela isizwe ngoba yizo ezanqoba inkezo yeCastle Lager ngo2018. Ziyaphindela futhi kulumqhudelwano phakathi komnyaka ngoba zibe yingqwele ngo-2019.
