uMthunywa
Siphathokuhle Ngulube
Salibonani bafundi. Ngithemba lenza kuhle ezifundweni zenu njalo liziphethe kuhle. Lamhla Sizakhangela indlela esiziphatha ngayo ngekhaya. Abanye bethu sisuka sithwalise nzima abazali ngenxa yokungamukeli izimo ezikhona emakhaya ethu.
Lokhu kwenza sicine singena ezintweni ezinengi ezimbi ngoba sifuna ukuthola lokho okunganeliswa ngabazali bethu. Kujwayelekile ukuthi abanye bethu baziqathanise labanye abantwana esikolo basuke bakhohlwe nje ukuthi bavela ezimulini ezehlukeneyo njalo ukuthola kwezimuli akufanani ngoba nje abazali besitsho ukuthi iminwe kayilingani.
Abanye bethu basuka bakhangele abangane ukuba bagqokeni, nxa kuyisicathulo esibiza intengo ephezulu basuka nje labo basifise bakhohlwe nje ukuthi imvelaphi yaleso sicathulo a bayazi.
Phela inzuzo zabantu kunzima ukuthi ubezazi lapho ezivela khona.
Uyasuka uhawukele kanti ke inzuzo leyo ingcolile nanku phela abanye basuka bathathe izinto zabantu bengaphiwanga. Ngalokho ke kuhle samukele khonokho esilakho ngekhaya sisuthiseke ngakho. Singaphili impilo esingayenelisiyo ngenxa yokuziqathanisa labanye. Ake sikhangele imumo engaphansi
(1) Ngakini lilomabonakude omncane kanti komakhelwane kulomabonakude omkhulu ongathi yibhayisikopo. Nxa sekufike isikhathi sokuthi ubukele umdlalo owuthanda kakhulu usuka ngakini uyebukela komakhelwane ngoba usithi umabonakude wangakini akakhanyi uze utsho lokuthi uyakucunula.
(a) Ukwenza kwakho lokhu kutshengisa ukuthi ulomuzwa bani ngomumo wangakini?
(b) Abazali bakho kubaphatha njani lokhu?
(c) Omakhelwane bona kubaphatha njani ukutshitsha kwakho emzini wabo usiyabukela umabonakude.
(2) Kulomdlalo omkhulu komalumakho. Linxusiwe lonke ngakini njengemuli. Abazali bakho bazamile ngazo zonke izindlela ukulithengela izimpahla zokuthi lani ligqoke phakathi kwabantu lingakhanyi ukuswela. Kuthi mhla welanga wena ukhanye usugqoke isigqoko esitsha kodwa esingayisiso osithengelwe ngabazali. Nxa ubuzwa utsho ukuthi usiboleke kumngane wakho ngoba lesi akade bekuthengele sona besingahambelani lawe.
(a) Abazali bakho bazasithatha njani isenzo sakho lesi?
(b) Similo bani osivezileyo ngokwenza lokhu?
(c) Bona abazali bomngane okuboleke isigqoko ubona angathi bangaphatheka njani bengezwa ukuthi wena uboleka impahla kumntanabo.
(3) Unyoko ukulungisele ukudla kokuthwala esikolo. Ngenxa yokuthi lokho kudla kuyakuyangissa uphenduka lakho kunjalo amalanga wonke unyoko aze akubuze. Impendulo yakho ithi unyoko kazame ukuhamba lezikhathi akufakele ukudla okungcono.
(a) Inkulumo le iyatshengisa yini ukuthi uyabazwela abazali bakho?
(b) Kuyatshengisa yini ukuthi uyawuzwisisa umumo wangakini?
Izehlakalo zonke ezingaphezulu ziveza ukuthi abanye bethu asifuni kwamukela umumo okhona emakhaya ethu. Sifuna ukuphila impilo esingayanelisiyo. Kuhle siziphilise ngalokho esilakho. A siqhubeke ngeviki ezayo.
