uMthunywa
Siphathokuhle Ngulube
Salibonani bafundi. Ngithemba liqhuba kahle kakhulu ezifundweni zenu nanku umnyaka usuphelile seliqalisile imihloliso. Ikhona indlela engemukelekanga eyokuziphatha ngalesi isikhathi.
Le indlela ingenza ukuba ucine ungabhalanga kuhle okungakhokhelela kumpumela engenhle. Okokuqala okuqakathekileyo ngesikhathi semihloliso yikuziphatha kuhle kanye lokukhetha abantu ohlanganela labo.
Ungeke phela uthi ubhala imihloliso uhlanganele labantu abangelani lezifundo njalo abavele bengafundi. Phela ingxoxo yenu iyabe ivele ingahambelani. Inengi lalaba abangelani lezifundo liyabe lilemininingwana ethile yokuzilibazisa engafana lokudlala inguqu kanye lokuhlala nje emabholohweni kuxoxwa izindaba ezingelani lesikolo.
Pho-ke wena olungiselela imihloliso ungabamdibi munye lenengi leli kukhona yini ozakuthola okulusizo okuphathelane lemihloliso? Impendulo ithi hatshi. Okunye njalo okungakhangelelwanga emuntwini olungiselela imihloliso yikuhlala kumabonakude ngekhaya kuze kuse. Yebo kambe kuvumelekile ukuba umuntu ake azilibazise kancane lanxa elungiselela imihloliso kodwa likhona inengi elingafuni kukhuthwa ngitsho ngumdlalo owodwa kumabonakude.
Kuqakathekile ukuba umuntu azincitshe injabulo ethile ngesikhathi semihloliso ukuze abe lokulungiselela okuhle. Phela imihloliso iyalungiselelwa bafundi. Awumane uvuke nje uyeqondana lephepha wena uluhlaza tshoko.
Okunye njalo okwesithathu okungenza umfundi olungiselela ukubhala azibone esenwaya ikhanda emhlolisweni engasakwazi ukuthi enzeni ngabangane. Bakhona abangane elihlanganela labo esikolo abacina bedala ukuthi lilahleke ezifundweni. Ngesikhathi semihloliso kukhangelelwe ukuba abafundi babe lamaqembu amancane awokuthi baxoxisane ngokwafundwayo bekhumbuzana. Amanye amaqembu kuyabe kungabangane nje. Ingxoxo zakhona emaqenjini la zicina nje zingaphathelananga lezifundo kanti isikhathi laso siyahamba. Kudlalwe-ke emaqenjini la kuthi omunye waleliqembu onguye obelahla iqembu ngamandla afike ngekhaya angabuquthi kuze kuse wena ulokhe ubambe ukuthi belidlala lonke.
Impumela nxa iphuma ubambe owangaphansi umngane ezitshaye wabhuqa zonke wena uphume lamaqanda wodwa. Ngalokho-ke kuhle sinanzelele abangane bethu ngalesi isikhathi singabi labangane abazasilahla singene iganga. Okunye njalo bafundi lesi yisikhathi sokuzibamba hatshi esokungena izindaba ezinenginengi ezidala imisindo njalo ezingekho emthethweni. Abanye benu bayathanda ukulwa kubangwa nje izinto ezingelancedo. Ukulwa akusinto enhle ngitsho. Uyaba lomnyama nje udobhe ilitshe utshaye lo olwa laye alahlekelwe ngumphefumulo wena ube uzitshela nje ukuthi yikulwa kwansuku zonke. Uyabe usulecala elikhulu okungadala ukuba uzibone ususentolongweni usuphuthelwe ngokwemihloliso.
Okunye njalo abafundi bayayengana batshelane ukuthi ukuze wenze kahle kumele uthathe izidakamizwa. Hatshi bafundi akukho okusiza umuntu nxa elungiselela imihloliso ngaphandle nje kokubala. Izidakamizwa ziyaphambanisa ingqondo. Ungazibona ususesibhedlela sabagula ingqondo ucine ungasayibhalanga laleyo mihloliso. Ngalokho-ke singayengani ngezidakamizwa.
Sikhumbuzane bafundi ukuba siyingxenye yezikolo esikuzo njalo singaphansi kwemithetho yalezi zikolo size siyebhala iphepha lokucina.
Kanti njalo sikhumbuzane ukuthi abake babonana bayaphinda babonane njalo, tshiya kwakhiwe ngoba lukhona usizo ongalufuna esikolo lanxa usuqedile izifundo zakho. Abadala bathi unganyeli emthonjeni ngoba kusasa ungavuka ufuna ukuyanatha kuwo. Kuqakathekile-ke ukuthi siziphathe kuhle kuze kube sekucineni. Asinanzeleleni indlela esiziphatha ngayo ngalesi isikhathi. Sizaqhubeka silimukisana size siyeqeda imihloliso. Ngilifisela inhlanhla lonke.
