uMthunywa
IKHABHINETHI idlulisele phambili ukuvulwa kwezikolo kukhangelelwe ukuthi uMongameli welizwe uEmmerson Mnangagwa abeke imithetho yesilinganiso sokuvalwa kokuhamba kanye lokusebenza kwabantu esiqinisiweyo kulandela ukumemetheka okwengezelelweyo kokuthelelwana kwalesisifo elizweni.
Inani labantu osekuqinisekiswe ukuthi balalumkhuhlane ngoMvulo beseliyi 1064 kugoqela asebasilayo abangu-343 kanye lasebedlula emhlabeni abangu-19 kusukela ngoMbimbitho.
Idolobho lakoBulawayo selikhonjwe njengelinye lamadolobho alabantu abanengi asebabanjwa lumkhuhlane osokwenze ikhabhinethi yanakana ukuthi kuhlolwe abantu abanengi ezigabeni ezitshiyeneyo.
Kulabo asebabanjwa belalumkhuhlane abangu-725 bangena elizweni belawo bevela emazweni e-Africa, Asia, Europe kanye le-Melika. Abantu abaphenduka ekhaya bevela eSouth Africa leBotswana yibo abanengi abangene bethwele lumkhuhlane kukanti abantu abathelelane kuleli bangu-309. Ekhuluma ku 24th post Cabinet briefing ngoLwesibili uMphathintambo wezokuhanjiswa kwembiko uMonica Mutsvangwa uthe izikolo kazisoze zivulwe mhlaka 28 Ntulikazi njengalokhu okwakumenyezelwe. Uthe uHulumende uzajezisa abezikolo ezizimeleyo asebaqala izifundo okungekho emthethweni.
“Ikhabhinethi ikhathazekile ngokumemetheka kwe-Covid-19 ikakhulu ukuthelelana okwakuleli kanye lokufa kwabantu. Ukuze kwenqatshelwe ukumemetheka kwalumkhuhlane kanye lokufa kwabantu kubangelwa yi-Covid-19 kuzalandelwa izimiso ezibalisa
(a) ukuqiniswa kwezimiso zokuvalelwa kwabantu ekuhambahambeni kanye lekusebenzeni emadolobheni akhanya elenani labantu abanengi abathelelana bephakathi kulamadolobho kanye lokuvulwa njalo kwezomkhonomi kuzavalwa;
(b) Ukuhlolwa kwabantu ezigabeni lapho okuthelelwana khona lumkhuhlane kakhulu njengakoBulawayo kuzakhutshulwa,” utsho njalo.
“(c) ukuthi ukuvulwa kwezikolo kudluliselwe phambili kukhangelelwe ukuthi kukhangelisiswe njalo kusiya ngesimo, kukanti ukubhalwa kwemihloliso kuzaqhubekela phambili;
(d) ukuthi izikolo ezizimeleyo esezavulwayo zizajeziswa.”
Kuviki edluleyo ilizwe libelenani labantu abathelelana bekuleli abanengi nxa kuqathaniswa lakumaviki edluleyo lapho ababanjwa belomkhuhlane lo abakade bengabavela phandle kwelizwe.
UMphathintambo Mutsvangwa uthe uHulumende nguye ozanikeza abafuna ukuhamba besuka kwelinye idolobho besiya kwelinye imvumo nxa kubalulekile ukuthi bahambe okugoqela abadinga usizo lwezempilakahle.
Uthe uHulumende uzanikeza amabhasi amabili kulabo ababanjwa belomkhuhlane we-Covid 19 besuka eBeitbridge besiya endaweni zokwehlukaniswa ezitshiyeneyo.
