uMthunywa
Ugwalo: Wangithembisa Lami
Olwalotshwa ngu I. N Mpofu
Siqhubeka ngezifundo esizithola egwalweni lwethu. Omalukazana bayafunda okuthile kuSolakele lapha ngendlela umalukazana aziphatha ngayo egumeni sesibeka eceleni ukuziphatha kwakhe ngesivumelwano ayesenze loMlahlwa.
USolakele ngowesifazana owayekhuthele okwamagama. Alikho nje lelilodwa ilanga lapho esingathi abakwabozala babekhala ngevila lenyoka. Ngesikhathi sokulima wayeziqondela emasimini labanawakhe bomkakhe ayezisebenzela kungendaba zalutho.
Inkuni wayehamba esiyatheza njengamanina wonke, asizwa lutho ngaye egwalweni lapha olulandisa ngengxabano zakhe labakwabozala.
Wayebahlonipha nje ngitsho laboSonile abantwana abancane. Yindlela-ke eyisibonelo esihle sokuziphatha emzini ukukhuthala kanye lokuhlonipha abantu bonke abasegumeni.
Laphambi komyeni wakhe wayelenhlonipho emangalisayo, lapho ethengelwe impahla wayebonga ngenhliziyo yakhe yonke sibili. Phambi komkakhe wayezehlisa okwamagama okokuthi lalapho esefisa ukuyahlala loNyembezi emsebenzini wakhe kazange abambe ngamandla lapho umkakhe engavumelani lombono wakhe.
Aluba wayelihlongandlebe, evele esazi ayekubalekela ekhaya wayevele nje ezathwala izikhwama zakhe aphume loNyembezi mhla esiya emsebenzini.
USolakele uyisibuko sikamalukazana wesiNtu lapho, esibeka eceleni iphutha lakhe loMlahlwa eliyinsindabaphenduli.
