uMthunywa
Ugwalo: Indlalifa ngubani olwalotshwa ngu N S Sigogo
Ophezulu Stinta
Siqhubeka sikhangela indikimba esihlangana lazo emdlalweni wethu. Kumaviki adluleyo sixoxe ngendikimba, yamasiko, eyenkolo, ukwabiwa kwelifa, kanye lengxabano.
Okumqoka esikunanzelelayo yikuthi indikimba lezi ziyaxhumana, zidale isifundo esithile zifeze njalo lenjongo zomlobi ezithile.
Indikimba yokuthathana siyayinanzelela njalo emdlalweni lapha. Sibona inguquko enkulu kakhulu kulokhu obekusenzeka njalo kujayelekile esintwini sakithi kanye lasempilweni esiphila kuyo kunsuku zalamuhla. Abesintwana izolo ngani nje bebengela lungelo kumbe bebengakhululekanga kakhulu ukuzikhethela labo ababathandayo bende ngokusemoyeni wabo.
Sinanzelela ukuthi unina kaMphunzo, kwathi lapho abazali bakhe benanzelela ukuthi wayesevele ezithwele kibo kwaku balulekile ukuthi endele endodeni enothileyo. Ihlazo lokuzithwala engakendi kwakungcono livalwe ngezinkomo.
Asilandiselwanga okunengi ngalowo owayemonile, kumbe ngumuntu owayefisa ukumthatha kodwa engelalutho umlobi ukutshiye kufihlakele. Leyo ndlela sinanzelela ukuthi ibagcinile abesintwana besemendweni loba nje kungekho sobala ukuthi bona babekujabulela na lokho, kumbe babebamba inhliziyo zabo ngamandla ukuze bagcwalise izifiso zabazali.
Sekuyingozi enkulu ke kulezi nsuku kusizukulwana sesimanjemanje kabasayingeni indaba yokwendisa loba eyokudingelwa umyeni, yibo asebehamba phambili bezidingela kukanti-ke ngengozi efana lemikhuhlane esikhona kulezi nsuku abazali balakho ukusunduzela abantwana ekufeni.
Okunye njalo esikuphawulayo kundikimba yethu abesintwana abendiswa ngendlela efana lale ekanina kaMphunzo babengelawo amandla okuphakamisa nje ilizwi elincinyane, okwabo yikuhlala emsamo umuntu engenelisi nje lokuphosa ilizwi laphezu kwalokho okuphezu kwamandla awasebenzele ngezakhe izandla.
Phezu kwendikimba yokuthathana sinanzelela njalo eyesithembu.
Kulapho okuvuka khona ingxabano ukuthi indlalifa yegumeni ephuma kwenye indlu ivele yona ngeyeqiniso na. Isithembu sona asizange sibe lokuthula nini lanini.
Umoya wengxabano esithenjini lapha ubonakala usuchithekela lasebantwaneni okudala ukungazwanani emulini. Udaba lwesithembu luyasikhipha lesidumbu kungabi ndaba zalutho.
