uMthunywa
Ugwalo: Indlalifa ngubani olwalotshwa ngu N S Sigogo
Ophezulu Stinta
Ngeviki edluleyo sixoxe kakhulu ngendikimba emqoka egwalweni lapha eyokulondozwa kwamasiko. Lapho ebesikhangela udaba oluyinsindabaphenduli, umbuzo othi wona okumele abe yindlalifa ngubani, njalo yiziphi impawu zendlalifa phakathi kwabantu bonke abasegumeni.
Silokhu silandela udaba lokuqakatheka kwamasiko, ngaphansi kwendikimba efanayo. Kulodaba lokubuyiswa kwabafileyo. Izolo leli siko belibusa okwamagama emizini yesiNtu njalo imideni eminengi ilithobele ngendlela emangalisayo.
Kwakukholelwa ukubana umuntu ofileyo akumelanga ahlale egangeni yedwa le njengoMlahlwa kodwa-ke wayelethwa ekhaya azokuba ngumlindi womuzi. Abantu-ke babekholelwa kabanzi kuleli siko yikho nje lalapho siqala ugwalo singena emzini wakoNdlovu bephezu kwesiko leli. Okokuthi lalapho lingasahambanga kuhle, abantwana besuke batshengisa indelelo ngokuxabana phakathi komsebenzi ongaka kukhangelwa njengendlela esizaletha ubunzima obukhulu phakathi kweguma lapha.
Indelelo yokuqhutshwa kwesiko leli ibatshazwa kakhulu njalo yayande ukulandelwa yisijeziso sokuhlanekelwa ngamadlozi. Siyananzelela njalo ukuthi nxa silandisa kanje udaba lokuqakathekiswa kwemasiko kusixhumanisa lodaba lwenkolelo.
Inkolelo ngenye yendikimba ezimqoka emdlalweni lapha. Isiko lombuyiso liqhutshwa nje ngenxa yokukholelwa ukuthi liqukethe amandla amakhulu emulini lapha. Isiko leli nxa sesilikhangela ngensuku zalamuhla sinanzelela ukuthi seligajelwa yisiKristu. Imuli ezinengi sezihambe zaguqukela ekukholweni eNkosini ephilayo eyiyo engumgcini wempilo zabantu, okokuthi akusandanga ukuthi kuzwakale kulomkhosi wemibuyiso emizini yabantu.
Sinanzelela nje lodaba lwendlalifa yekhaya ludaba lalo olwasungula futhi kundikimba yenkolelo. Kwakholelwa kwabanjwa udaba lokuthi umntwana wokuqala egumeni nguye okumele abeyindlalifa, nguye okukhangelelwe ukuthi abelane labanye abantwana egumeni lapha ilifa likayise.
Umbuzo ovukayo uyabe susithi kanti indlalifa yona yehluke ngaphi phakathi kwabanye abantwana njengoba layo nje iyazalwa egumeni lapha. Siyananzelela ukuthi inkolelo yenelisile ukuqoqa imideni kuthi njalo ngakolunye uhlangothi yenelisa ukudiliza imideni kwadaleka ingxabano kanye lenzondo. Ngamandla endikimba yenkolelo.
